Óńirdegi praımerız jeńimpazdary respýblıkalyq deńgeıge ótý úshin pikirsaıysqa qatysady
2020 jylǵy 6 qazan 19:10

Óńirdegi praımerız jeńimpazdary respýblıkalyq deńgeıge ótý úshin pikirsaıysqa qatysady

NUR-SULTAN. QazAqparat – Óńirlik praımerız jeńimpazdary respýblıkalyq deńgeıge ótý úshin pikirsaıysqa qatysady. Bul týraly «Nur Otan» partııasynyń hatshysy Arman Qyryqbaev aıtyp berdi, dep habaralıdy QazAqparat tilshisi.

Brıfıng barysynda partııa hatshysyna Májiliske partııalyq tizim qalyptastyrý jóninde suraq qoıyldy.

«Bul protsess qatań túrde rettelgen, praımerızdi ótkizý erejeleri bar, onda bári kórsetilgen. Qarapaıym tilmen túsindirsem, aýdandyq deńgeıdegi máslıhattar úshin baıqaý aıaqtaldy dep sanalady, endigi is jergilikti partııalyq organda. Olar aýdandyq deńgeıde, fılıal deńgeıinde, bıýro deńgeıinde bekitilýi kerek. Oblystyq deńgeıge jáne odan ári Májiliske baratyndarǵa kelsek, bizde reıtıngtik daýys berý júrgizildi. Aýdandar boıynsha birinshi orynǵa ıe bolǵandar – ıaǵnı birinshi nómir jáne taǵy bir ilespe kandıdat, olar ári qaraı irikteýge qatysý úshin oblystyq deńgeıge jiberiledi», - dep jaýap berdi hatshy QR Prezıdenti janyndaǵy Ortalyq kommýnıkatsııalar qyzmetinde.

Brıfıng barysynda spıker barlyq aýdandar men oblys ortalyǵynyń jeńimpazdary arasynda pikirtalas ótetinin aıtty.

«Úmitkerler aımaqtyń kvotasyna sáıkes usynylady. Mysaly, saılaýshylardyń belgili bir bóligi turatyn Almaty oblysyn alaıyq – daýys berý quqyǵy bar QR barlyq turǵyndarynan osy oblystyń úlesi esepteledi, soǵan saı kvota bolady, osy kvotaǵa sáıkes Taldyqorǵan qalasy depýtattar sanyn shyǵarady. Oǵan qosa, olar oblystyq partııa konferentsııasy barysynda debat júrgizedi. Onyń arasynan jeńimpazdar anyqtalady, keıin olar «Nur Otan» partııasynan Májiliske partııalyq tizimine engiziledi», - dedi Arman Qyryqbaev.

Eske sala ketsek, «Nur Otan» partııasynyń hatshysy Arman Qyryqbaev «Praımerız 2020» ishki partııalyq irikteýiniń negizgi qorytyndysyn baıandady.

Onyń aıtýynsha, praımerızge uzyn sany 10 990 kandıdat qatysqan jáne onyń 7 143-i ózin-ózi usynǵan. Úmitkerlerdiń ortasha jasy – 43. Onyń 36,7% astamy – áıelder, 29% – 35 jasqa deıingi jastar boldy.

QR Prezıdenti janyndaǵy Ulttyq qoǵamdyq senim keńesiniń múshesi, saıasattanýshy Erlan Saıyrov áleýmettik jelide belsendi bolǵandardyń praımerızde nege jeńilip qalǵanyn túsindirdi.

«Nur Otan» partııasynyń Partııalyq baqylaý komıtetiniń tóraǵasy Pavel Kazantsev praımerızde qandaı erejelerdiń óreskel buzylǵanyn aıtyp berdi.


Jańalyqtar

MURAǴAT