Óńeshine ıne turyp qalǵan tarazdyq aman qaldy

TARAZ. QazAqparat – Tarazdyq dárigerler ıne jutyp qoıǵan turǵyndy aman alyp qaldy, dep habarlaıdy QazAqparat tilshisi.

Taraz qalalyq kópbeıindi aýrýhanasyna aıaq astynan ókpesi shanshyp, aýa jetispeı, qınalǵan 27 jastaǵy B. esimdi áıel adam kelip tústi.

Onyń aıtýynsha, birer kúnnen beri ózin nashar sezine bastaǵan. Qala syrtynda turatyn ol alǵashynda aýrýyna mán bermeı, ortalyqqa qatynaýdy qıyn kórip, jazylyp keter degen senimmen júre bergen. Ýaqyt ozǵan saıyn tamaǵynan as ótpeı, óńeshinde bógde zat turǵandaı áser alǵan soń ǵana aýrýhanaǵa kelgen.

Taraz qalalyq kópbeıindi aýrýhanasynyń dárigerleri shuǵyl túrde naýqasty rentgenografııaǵa túsirip, tamaǵynda ıne turǵandyǵyn anyqtaıdy. Naýqas ıne jutyp qoıǵanyn ózi de baıqamaǵan.

Hırýrgııa bóliminiń meńgerýshisi, endoskopıst-hırýrg Rahymjan Ǵabıden kóp oılanbastan, adamnyń ishki organdaryn arnaıy aspap arqyly tekserý ádisimen jasalatyn endoskopııalyq ota jasaýǵa sheshim qabyldaǵan.

«Bógde zatty baıqamaı jutyp qoıatyn nemese eriksiz ishke túsip ketetin mundaı jaǵdaılar - turǵyndar arasynda kóp kezdesedi. Kóp jaǵdaıda, nerv talshyqtaryna tımese, mundaı áreketter alǵashynda adamdy asa mazalamaıdy. Biraq, bógde zat aǵzaǵa ózdiginen sińip nemese shyǵyp ketpeıdi. Sondyqtan, mundaı jaǵdaıǵa jol bermeýge tyrysý kerek,- deıdi Rahymjan Ǵabıden.