Olar uzaq ýaqyt qıyn jaǵdaıda ómir súrgen – SІM Iraktan qaıtarylatyn qazaq balalar jaıly

NUR-SULTAN. QazAqparat – QR SІM resmı ókili Aıbek Smadııarovtyń aıtýynsha, Iraktan qazaq balalaryn qaıtarý operatsııasy áli júrgizilmegenin málim etti, dep habarlaıdy QazAqparat tilshisi.

«Operatsııa áli ótkizilgen joq. Biz Irak tarapymen kelissóz júrgizip jatyrmyz. Sonymen birge, áleýmettik jáne turmystyq sıpattaǵy daıyndyq jumystary pysyqtalýda. Sebebi, kelgennen keıin ol balalardyń barlyǵy «Jýsan» operatsııasy kezindegideı birden karantınge jatqyzylady. Olardy ońaltý úshin ýaqyt qajet. Olar uzaq ýaqyt boıy qıyn jaǵdaıda ómir súrgen. Sol sebepti, jýyq arada operatsııa júrgiziler dep otyrmyz. Naqty ýaqytty biz áli kelisken joqpyz», - dedi Aıbek Smadııarov SІM-de ótken baspasóz máslıhatynda.

QR SІM resmı ókili ol jaqtan 2-13 jas aralyǵyndaǵy 10-nan asa bala qaıtarylatynyn atap ótti.

«Meniń oıymsha, aldaǵy eki aptanyń ishinde bári atqarylýy tıis», - dedi Aıbek Smadııarov.

Eske sala ketsek, elordada 9 qazanda ótken Eýropadaǵy qaýipsizdik jáne yntymaqtastyq uıymynyń (EQYU) Aýǵanstan boıynsha jıynynda QR Syrtqy ister mınıstri Muhtar Tileýberdi Qazaqstannyń Iraktan birneshe balany qaıtarý baǵytynda jumys júrgizip jatqanyn habarlaǵan bolatyn.

«Olardyń analary sol jaqta ómir boıyna bas bostandyǵynan aıyrylǵan», - degen edi mınıstr.