Oqýshylar avtobýsyn buryn sottalǵan adamdar júrgizgen - Bas prokýratýra
2022 jylǵy 4 shilde 10:13

Oqýshylar avtobýsyn buryn sottalǵan adamdar júrgizgen - Bas prokýratýra

NUR-SULTAN. QazAqparat - Bas prokýratýra bilim berý mekemeleriniń balalardy tasymaldaý qyzmetterin usyný sapasy men qaýipsizdigin taldaý aıasynda kóptegen buzýshylyqtardy anyqtady, dep habarlaıdy QazAqparat.

Bas prokýratýranyń habarlaýynsha, júrgizýshi kýáliginiń merzimi ótip ketken jáne qajetti júrgizý sanaty jáne tasymaldaýshynyń jolaýshylar aldyndaǵy jaýapkershiligin mindetti saqtandyrýy joq júrgizýshilerdiń balalardy tasymaldaý faktileri tirkeldi.

Jekelegen óńirlerde oqýshylardy tasymaldaýǵa buryn qylmystyq jaýaptylyqqa tartylǵan jáne balalarmen jumys isteýge quqyǵy joq adamdar jiberilgen.

Keıbir avtobýstar reıs aldyndaǵy tehnıkalyq qarap-tekserýden, al júrgizýshiler – medıtsınalyq kýálandyrýdan ótpegen.

Jalpy, avtobýs parkiniń jaı-kúıi, olardyń materıaldyq-tehnıkalyq jabdyqtalýy (órt sóndirgishterdiń, qaýipsizdik beldikteriniń, jarqyldaýyq maıaktardyń, «Balalardy tasymaldaý» taqtaıshalarynyń bolmaýy jáne t.b.) qaýipsizdik talaptaryna sáıkes kelmeıdi dep tanyldy.

Aǵymdaǵy jylǵy 28 sáýirde Bas prokýratýra Bilim jáne ǵylym mınıstrliginiń atyna prokýrorlyq qadaǵalaý aktisin engizdi, ony qaraý nátıjeleri boıynsha jol berilgen buzýshylyqtar úshin 93 adam (onyń ishinde mektep dırektorlary, balabaqsha meńgerýshileri, ákimdikter qyzmetkerleri) tártiptik jaýaptylyqqa tartyldy.

Avtoparkty jańartý jáne balalardy tasymaldaý úshin óńirler mektepterin avtobýstarmen qamtamasyz etý jumystary bastaldy. Ákimdikter 515 jańa avtobýsty, olardyń bir bóligin aldaǵy oqý jylyna qaraı satyp alýdy josparlap otyr.

Sonymen qatar Oqý-aǵartý mınıstrligi qazirgi ýaqytta Іshki ister mınıstrligimen birlesip tasymaldaýdyń (mektep kóligimen) qaýipsiz jaǵdaılaryna oqýshylar quqyqtarynyń saqtalýy belgisine tekserýler júrgizýde.


Foto: www.alltruckjobs.com


Uqsas jańalyqtar
Seriktester jańalyqtary

Jańalyqtar

Úrdis

MURAǴAT