Oksana Ten: Vıtse-prezıdent laýazymyn maǵan Bolat Jámishev usyndy
2022 jylǵy 27 qańtar 18:50

Oksana Ten: Vıtse-prezıdent laýazymyn maǵan Bolat Jámishev usyndy

ALMATY. QazAqparat - Ulttyq konkıshiler federatsııasynyń vıtse-prezıdenti Oksana Ten qyzmetin bosatý týraly ústinen jazylǵan aryzǵa baılanysty baspasóz máslıhatyn ótkizdi, dep habarlaıdy QazAqparat tilshisi.

Eń aldymen Ulttyq konkıshiler federatsııasynyń vıtse-prezıdenti baspasóz máslıhatyn ótkizýdiń basty sebebin aıtty.

«Meni osy baspasóz máslıhatyn ótkizýge májbúr etkeni – kúni keshe Sergeı Voronovtyń telefonyna bireýler qońyraý shalyp, onyń ómirine qaýip tónip turǵanyn, Qazaqstandy múlde umytsyn degeni boldy. Mánerlep syrǵanaýdaǵy osy máseleni eskere otyryp jáne oǵan tıisti organdar nazar aýdarýy múmkin dep baspasóz máslıhatyn ótkizip otyrmyz»,- dedi ol.

Jıyn barysynda Oksana Ten federatsııanyń «vıtse-prezıdent» laýazymyna ózi eshqashan suralmaǵan, kerisinshe oǵan bul laýazymdy usynǵan.

«Menen sportta qalýǵa, mánerlep syrǵanaýdyń damytýǵa kómektesýge, uzaq jyldar boıy mánerlep syrǵanaýda jınaǵan tájirıbemmen bólisýdi, mánerlep syrǵanaýdy damytý strategııasyn ázirleýge kómektesýdi surady. Bul 2019 jyldyń kóktemi edi. Ol kezde federatsııa prezıdenti Bolat Jámishev edi. Maǵan sol kisi osy laýazymdy usyndy. Men bul laýazymǵa barǵym kelgen joq. Biraq, sporttyń damýyna úles qosaıyn dep oǵan kelisim berdim»,- dedi Oksana Ten.

Al áleýmettik jelige jarııalanǵan aryz hat boıynsha óz oıyn bylaı jetkizdi.

«Eń aldymen maǵan biz qanshalyqty durys jolda júrmiz degen oı keldi. Sebebi, meniń federatsııada júrgenime eki jyl ýaqyt ishinde kóptegen ózgerister bolǵan sekildi. Degenmen bul ózgerister oǵan múddeli jáne qyzyqty emes kóp jattyqtyrýshylarǵa áser etti. Men muny senimdi túrde aıtamyn. Sebebi, bul ózgerister qarjydan bastap sport resýrsyna deıingi aralyqtyń bárin qamtydy», - dedi ol.

Eske salaıyq, mánerlep syrǵanaýdan Qazaqstan jatttyqtyrýshylary Oksana Tenniń qyzmetin bosatsyn degen aryz hat jazdy. Hattyń mátini áleýmettik jelide jarııalandy.

Aıta keteıik, Oksana Ten 2019 jyldan beri Ulttyq konkıshiler federatsııasynyń vıtse-prezıdenti. Ol qazaqstandyq mánerlep syrǵanaýshy, 2014 jylǵy Qysqy Olımpıada oıyndarynyń qola júldegeri Denıs Tenniń anasy. Denıs Ten 2018 jyly Almatyda eki qylmyskerdiń qolynan qaza tapqan.

Al Sergeı Voronov – Reseıden shaqyrylǵan, mánerlep syrǵanaýdan Qazaqstan quramasynyń jańadan taǵaıyndalǵan bas jattyqtyrýshysy.


Jańalyqtar

MURAǴAT