Nurtóre Júsip: Aıyptaý – ońaı, aqıqatqa qol jetkizý – qıyn
2022 jylǵy 21 qańtar 12:05

Nurtóre Júsip: Aıyptaý – ońaı, aqıqatqa qol jetkizý – qıyn

NUR-SULTAN. QazAqparat - QR Parlamenti Senatynyń deptýtaty Nurtóre Júsip Eýropa Parlamentiniń Qazaqstanǵa qatysty arnaıy qararyna qatysty pikir bildirdi, dep habarlaıdy QazAqparat tilshisi.

«Frantsııanyń Strasbýrg qalasynda Eýropa Parlamentiniń bıylǵy alǵashqy plenarlyq otyrysy ótken eken. Sol otyrysta Qazaqstandaǵy qańtar oqıǵalary talqylanyp, Eýropa Parlamenti Qazaqstanǵa qatysty arnaıy qarar qabyldapty. Bul birjaqty qabyldanǵan qarar. Alysta otyryp, bizdiń elimizde oryn alǵan oqıǵalar týraly bulaı syrttan ton pishý durys emes. Aldymen eldegi jaǵdaıdyń qandaı bolǵany, oqıǵalardyń qalaı órbigeni jóninde ártúrli aqparat kózderinen shynaıy aqparat alý qajet edi. Bul úshin parlamentaralyq is-qımyl arnalarynyń aqparattaryn paıdalaný aqylǵa qonymdy bolar edi. Ókinishke qaraı Eýropa Parlamenti birqatar BAQ pen áleýmettik jelidegi jelsózderdi ǵana basshylyqqa alǵanǵa uqsaıdy. Bir nárseniń basyn ashyp alý qajet. Qańtar dúrbeleńi kezinde beıbit sherýge shyqqandar boldy. Bul daýsyz derek. Al ary qaraı jaǵdaıdy ýshyqtyryp, arandatý áreketterine barǵan búlikshil, buzaqy pıǵyldaǵylar bolǵany da anyq. Jappaı tonaýǵa, órteý men qıratýǵa kiriskender solar», dedi ol.

Senator qazir elimizdegi quzyrly organdar bul oqıǵany túp-tamyryna deıin tekserip jatqanyna basa nazar aýdartady.

«Ekinshi másele. Oqıǵalar barysyna tereń saraptama júrgizetin bolsaq, beıbit sherý qańtardyń alǵashqy kúnderi elimizdiń batys aımaǵynan bastalyp, eshqandaı búlik bolmaǵanyn kóremiz. Tipti «Almaty tragedııasynan» keıin batys óńirde, Mańǵystaý jaqta sabaqty buta da synǵan joq. Eshteńe búlingen joq. Bılik tarapynan qandaı da bir qatty qysym bolmaǵany belgili. Azamattardyń beıbit sherýge shyǵý, óz talaptaryn bildirý quqyǵy saqtaldy. Sherýge shyqqandar gazdyń baǵasyn túsirý týraly talap etti. Bılik bul talapty oryndady. Memleket basshysy «barlyq talaptar eskeriledi, tıisti sheshimder qabyldanady» dep aıtty. Artynsha Úkimet doǵarysqa ketti. Elde áleýmettik-ekonomıkalyq naqty sharalar qabyldanatyny habarlandy», dedi Nurtóre Júsip.

Alaıda, ol Qazaqstanǵa qarsy agressııa jasaǵysy kelgender munymen qanaǵattanyp qalmaǵandyǵyn atap ótedi.

«Beıbit sherýdiń artyn lańkestik áreketterge ulastyrýdy kózdep, bulǵaqty bastap jiberdi. Úshinshi kúshter el irgesin shaıqaýǵa umtyldy. Áýelgi áleýmettik-ekonomıkalyq talaptar jaıyna qaldy. Elimizdiń birqatar aımaǵynda memlekettik mekemelerge, ákimshilikter men saýda ortalyqtaryna, dúkenderge qaraqshylyq shabýyl jasaldy. Jaǵdaı shekten shyǵyp ketken soń quzyrly organdar halyqty qorǵaý úshin qarý qoldanýǵa májbúr boldy. Mundaı jaǵdaıda búlikshilermen kelissózge kelý múmkin bolmaı qaldy. «Azattyqtyń altyn besigi» atanǵan Almatyny ot pen órtke orap, aıaýsyz qıratý oryn aldy.Basqa birqatar aımaqta bir ortalyqtan basqarylǵan búldirý áreketteri jalǵasty. Memleketimizdiń taǵdyry qyl ústinde turdy. Syrtqy kúshter jaǵdaıdy óz maqsattaryna paıdalanyp, Qazaqstandy otqa oraǵysy kelgenin kózi qaraqty adamdardyń bári kórdi. Sondyqtan azamattardyń beıbit sherýge shyǵýyn shektep, quqyqtaryn buzdy degen aıyp tipten retsiz. Qazaqstan Respýblıkasynyń basshylyǵy tapsyrǵan resmı tergep-tekserý nátıjeleri jarııalanǵanǵa deıin mundaı qujatty qabyldaý da qısynsyz. Tergep-tekserý nátıjeleri halyqaralyq qoǵamdastyqqa usynylatyn bolar. Sol kezde el de, álemdik qaýymdastyq ta aqıqatqa kóz jetkizetin bolady», dedi Nurtóre Júsip.


Jańalyqtar

MURAǴAT