Nurlan Noǵaev Mańǵystaýda ashylǵan qant zaýyty nege jumys istemeı turǵanyn aıtty
2022 jylǵy 30 maýsym 13:18

Nurlan Noǵaev Mańǵystaýda ashylǵan qant zaýyty nege jumys istemeı turǵanyn aıtty

NUR-SULTAN. QazAqparat – Ortalyq kommýnıkatsııalar qyzmetinde ótken brıfıngide Mańǵystaý oblysynyń ákimi Nurlan Noǵaev óńirde ashylǵan qant zaýyty nege jumys istemeı turǵanyn aıtty, dep habarlaıdy QazAqparat tilshisi.

«Endi bul jeke kásipkerdiń atqaryp otyrǵan isi. Ózińiz bilesiz, qandaı da bir sharýany atqarý úshin bárin jan-jaqty úılestirý kerek. Bizdiń tabıǵı erekshelikterimiz qyzylsha egýge kelmeıdi. Biraq biz oǵan joq demedik. Sol kásipker ózi qant shyǵarýǵa syrttan shıkizat ákeletinin aıtyp, nıet tanytty. Biz óz tarapymyzdan qoldaý kórsettik. Bıznesti qoldaý sharalarynyń aıasynda qarjylyq, ákimshilik kómek berdik. Ózim de ınvestormen birneshe ret kezdestim. Degenmen, qazirgi tańda is júrmeı tur. Bul – bıznes. Bastaǵan isiń josparlaǵandaı júrip ketse, quba-qup. Ókinishke qaraı, obektıvti, sýbektıvti sebepter bar», - dedi Nurlan Noǵaev.

Sondaı-aq, ol Jańaózende barlanǵan munaıdyń qazirgi qory qosymsha zaýyt ashýǵa múmkindik bermeıtinin basa aıtty.

«Báriniń talap etip otyrǵany bir zaýyt ashsa, jumyssyzdardyń bári sol jerge kiredi ǵoı degenge saıady. Keı kezderi bul – múmkin emes sharýa. Mamandardyń aıtýy boıynsha, jerasty izdestirý jumystaryna ınvestıtsııa salynbasa, Jańaózen ken ornynyń qory 25-30 jylǵa jetetinin aıtyp otyr», - dedi ákim.

Eske salsaq, keshe QR Májilis depýtaty Edil Jańbyrshın Úkimet basshysy Álıhan Smaıylovtyń atyna Mańǵystaý oblysyndaǵy eńbekdaýlary týraly saýal joldadǵan edi.


Seriktester jańalyqtary

Jańalyqtar

Úrdis

MURAǴAT