Jańalyqtar  >
Nur-Sultanda VIII Halyqaralyq armııa oıyndarynyń ashylý rásimi ótti
2022 jylǵy 13 tamyz 18:25

Nur-Sultanda VIII Halyqaralyq armııa oıyndarynyń ashylý rásimi ótti

NUR-SULTAN. QazAqparat – Nur-Sultanda VIII Halyqaralyq armııa oıyndarynyń ashylý rásimi ótti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Ulttyq qorǵanys ýnıversıtetinde ótken Halyqaralyq armııa oıyndarynyń saltanatty ashylý jıynyna Ázerbaıjan, Armenııa, Belarýs, Venesýela, Vetnam, Zımbabve, Qazaqstan, Qytaı, Qyrǵyzstan, Malı, Reseı, Tájikstan jáne Ózbekstan Qarýly kúshteriniń ókilderi qatysty.

Qorǵanys mınıstri general-polkovnık Rýslan Jaqsylyqov Qazaqstan aýmaǵyndaǵy VIII Armııa halyqaralyq oıyndaryn saltanatty túrde ashyq dep jarııalady.

Qazaqstan qorǵanys vedomstvosynyń basshysy halyqaralyq oıyndarǵa qatysýshylarǵa arnaǵan sózinde saıystyń áskerı qyzmetshilerdiń jaýyngerlik daıarlyǵy men kásibı sheberligin jetildirýdegi mańyzdy rólin atap ótti.

– Áskerı oıyndar beıbitshilik pen yntymaqtastyqtyń kepili retinde shyn máninde túrli memleketter áskerleriniń ózara is-qımylynyń jańa jáne jetildirilgen úlgisine aınalyp, qatysýshy elder qarýly kúshteriniń jaýyngerlik qabileti men kásibı deńgeıin arttyrýǵa yqpal etip otyr, – dep atap ótti general-polkovnık Rýslan Jaqsylyqov.

Bıyl elimizdiń aýmaǵynda úsh baıqaý ótkiziledi. Olar – «Artıllerııadan oq atý sheberleri», «Merıdıan» jáne «Taktıkalyq mergen» baıqaýlary. Sońǵy ekeýi Qazaqstanda alǵash ret uıymdastyrylyp otyr.

Elimizde ótetin saıystarda barlyǵy 26 komanda baǵyn synaıdy. Jambyl oblysynyń Gvardeısk garnızonyndaǵy oqý-jattyǵý polıgonynda mınaatqysh eseptoptarynyń úzdikterdi anyqtalady.

Aqmola oblysynyń ýchınsk qalasyndaǵy «Amandyq» polıgonynda áskerı topograftardyń saıysy ótse, Qaraǵandy oblysynyń «Spassk» oqý-jattyǵý ortalyǵynda armııa mergenderi jaryspaq.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT