Nur-Sultanda senbi-jeksenbidegi aýyl sharýashylyǵy jármeńkesi jalǵasa beredi

NUR-SULTAN. QazAqparat - Elordada aýyl sharýashylyǵy jármeńkeleri jalǵasýda, dep habarlaıdy QazAqparat.

Qalalyq ákimdiktiń málimetine sensek, «Aspan bazary» saýda úıinde (Qoshqarbaev, 37) ár demalys saıyn aýyl sharýashylyǵ jármeńkesi ótkiziledi.

Onda sharýa qojalyqtary men aýylsharýashylyq taýar óndirýshileriniń azyq-túlik ónimderi usynylǵan.

«Aspan» basshylyǵy jármeńkege qatysýshylarǵa aqysyz oryn usynady», - deıdi «Aspan» bazarynyń atqarýshy dırektory Aıtýǵan Qulmahambetuly.

Taýarlardy satatyn kásipkerler barlyq jaǵynan qolaıly jaǵdaı jasalǵanyn atap ótti. Sórelerde kókónister men jemister naryq baǵasynan tómen satylýda.

«Biz bul múmkindikke rızamyz. Qııar men qyzanaq qymbat emes. Mysaly, qııar baǵasy 350-400 teńge, basqa bazarlarmen salystyrǵanda tıimdi», - deıdi kásipker Lıra Іlııasova.

Siz sondaı-aq sút ónimderi men joǵary sortty etti arzan baǵamen satyp ala alasyz. Aqmola oblysynyń sharýa qojalyqtary men «Bakara» JShS sıyr etiniń kelisin 1750 teńgeden usynady.

«Іri qara eti 1750 teńgeden satylýda. Jylqy etiniń baǵasy 1900 teńgeden. Buǵan deıin sıyr eti 2000-2200, jylqy eti 2400 teńgeden satylatyn. Jármeńkede biz baǵany tómendetemiz», - deıdi kásipker Raıhan Shadanova.

Jármeńkeniń turaqty kelýshileri - jaqyn mańdaǵy turǵyndar.

«Biz jaqyn mańda turamyz. Baǵasy arzan bolǵan soń osynda kelemiz. Bul jerde qyryqqabat pen pııazdyń baǵasy 80 teńge. Baǵalar jaqsy», - deıdi elorda turǵyny Venera Izeeva.

Aqmola jáne Qaraǵandy ​​oblystarynyń fermerleri azyq-túlik ónimderin ákeledi.

«Biz osy aýdanda turamyz. Jármeńke týraly estip, baǵalardy basqa oryndarmen salystyrdyq. Óte tıimdi jáne qol jetimdi. Búgin un men maı alýǵa keldim. Munda bári kóterme baǵamen jáne óte arzan», - deıdi Baýyrjan Danııaruly.

Jármeńke apta saıyn senbi men jeksenbide ótkiziledi. Uıymdastyrýshylar kelýshiler sanıtarlyq normalardy qatań saqtaý keregin eskertedi.