Nur-Sultanda demalys kúnderi qansha avtobýs reıske shyǵady

NUR-SULTAN. QazAqparat – Elordada demalys kúnderi qansha avtobýs reıske shyǵady? QazAqparat tilshisiniń bul suraǵyna «Astana LRT» kompanııasynyń baspasóz qyzmeti jaýap berdi.

«Jumys kúnderi astana kóshelerine 871 avtobýs shyǵady. Al senbide - 719, jeksenbide - 709 avtobýs turǵyndardy tasymaldaıdy» delingen jaýapta.

Kompanııa usynǵan aqparatqa sáıkes, qoǵamdyq kólikterdiń júrý kestesi – baǵdarlardyń túri (qala, ekspress, qala mańy), tolymdylyq kezeńi, aýdandarǵa qyzmet kórsetý, suranys boıynsha jumys bastaý, suranys boıynsha qozǵalys aralyǵy sekildi faktorlardy eskere otyryp jasalady.

«Astana LRT» kompanııasy sonymen qatar, aptanyń ár kúni boıynsha keste árbir baǵdarǵa jeke jasalatynyn habarlaıdy. Máselen, aptanyń kúnderin saralaı otyryp, avtobýstyń tolymdylyǵy, ýaqyty, halyqtyń suranysy da ózgerip otyrýy múmkin.

«Demalys kúnderi qoǵamdyq kólik senbilik jáne jeksenbilik kestege saı júredi. Jalpy ol kúnderi qala joldarynda jolaýshylardyń azaıatyny belgili» delingen kompanııa jaýabynda.