Nur-Sultan qalasynda jaıaý júrginshiler promenady ashyldy
2022 jylǵy 6 shilde 19:25

Nur-Sultan qalasynda jaıaý júrginshiler promenady ashyldy

NUR-SULTAN. QazAqparat - Qala turǵyndarynyń bos ýaqytyn jaıly ótkizýi úshin kezekti bir jaıaý júrginshiler joly abattandyryldy, dep habarlaıdy QazAqparat elordanyń resmı saıtyna silteme jasap.

Endi Baraev kóshesi (Respýblıka dańǵylynan Sh.Ýálıhanov kóshesine deıin) kartadaǵy qarapaıym oryndardyń biri ǵana emes, jańa qoǵamdyq keńistikke aınaldy.

Jaıaý júrginshiler promenadynda balalarǵa arnalǵan oıyn alańdary, átkenshekter, óz ónerin kórsetý úshin ımprovızatsııalanǵan kórinisterge, elektr avtokólikterin zarıadtaýǵa arnalǵan arnaıy oryndar jáne t.b. bar.

Jaıaý júrginshiler ótkelinde qala turǵyndary arasynda múmkindigi shekteýli jandardyń júrip-turýyna kedergi keltirmeıtin orta quryldy, trotýarlar keńeıtildi, sol sııaqty aýmaǵy kógaldandyrylyp jatyr. Bul qoǵamdyq keńistikti odan ári damytatyn bolamyz, qazir onda abattandyrý boıynsha tıisti jumystar júrgizilýde.

Bul mańaıda jaıaý júrginshiler promenadyn ashý jónindegi ıdeıa ornalasqan jerine, qala turǵyndarynyń kóptep júrýine, tıisinshe demalatyn orynnyń bolmaýyna baılanysty paıda boldy. Qoǵamdyq keńistik tujyrymdamasyn ýrbanıstıka ortalyǵy men aýdan ákimdigi turǵyndarmen birlesip talqylady.

«Nur-Sultan – jaıly qala» master-jospary aıasynda bıyl 200-den astam aýla men qoǵamdyq keńistik abattandyrylady. Onyń ishinde 100-ge jýyǵy ashylyp, qala turǵyndary men qonaqtarynyń ıgiligi úshin paıdalanýǵa berildi.

Búgin, máselen, jańa amfıteatr (Esil ózeni men Beıbitshilik jáne kelisim saraıy arasyndaǵy saıabaqta ornalasqan) ashylady. Amfıteatr sahnasynda «Astana Opera» teatrynyń ártisteri óner kórsetedi. Kaskadty amfıteatr saıabaqty úılesimdi túrde jalǵaı túsedi jáne qala turǵyndarynyń demalatyn ári shyǵarmashyl jandardyń talantyn pash etetin orynǵa aınalady», – dep jazdy elorda ákimi.



Uqsas jańalyqtar

Jańalyqtar

Úrdis

MURAǴAT