«Nur Otan» partııasynyń saıası keńesiniń jańa quramy jarııalandy
2022 jylǵy 28 qańtar 17:16

«Nur Otan» partııasynyń saıası keńesiniń jańa quramy jarııalandy

NUR-SULTAN. QazAqparat – «Nur Otan» partııasynyń saıası keńesiniń jańa quramy jarııalandy, dep habarlaıdy QazAqparat partııanyń baspasóz qyzmetine silteme jasap.

«Nur Otan» partııasynyń kezekten tys HHІ sezinde saıası keńestiń 92 adamnan quralǵan jańa quramy bekitildi. Buǵan deıin «Nur Otan» partııasy óz saıası keńesindegi ózgerister týraly jarııalaǵan edi. Jalpy, partııanyń joǵary ókildi organy 55%-ke jańarǵan.

Sonymen birge, Memleket basshysy Qasym-Jomart Toqaev «Nur Otan» partııasynyń Tóraǵasy bolyp biraýyzdan saılandy.

Saıası keńestiń aldyńǵy tiziminde 100 adam bolǵan, jańa tizimge enbegender qatarynda – Mádenıet jáne sport mınıstri Dáýren Abaev, QR Memlekettik hatshysy Erlan Qarın, Májilis depýtaty Darıǵa Nazarbaeva, «Nur Otan» partııasy Tóraǵasynyń birinshi orynbasary Baýyrjan Baıbek, burynǵy Premer-Mınıstr Asqar Mamın, Almaty qalasynyń ákimi Baqytjan Saǵyntaev, Esep komıtetiniń tóraǵasy Natalıa Godýnova bar.

Al jańa músheler qatarynda – el Prezıdenti Qasym-Jomart Toqaev, Parlament Senatynyń tóraǵasy Máýlen Áshimbaev, Májilis tóraǵasy Nurlan Nyǵmatýlın, Prezıdent ákimshiliginiń jetekshisi Erlan Qoshanov bar.

Bekitilgen kún tártibine sáıkes, Nur Otan partııasynyń kezekten tys XXI sezinde úsh másele qaraldy. Olar – partııanyń Tóraǵasyn saılaý týraly, jarǵyǵa ózgerister men tolyqtyrýlar engizý týraly jáne saıası keńes quramyna ózgerister engizý týraly máseleler.



Jańalyqtar

MURAǴAT