Nur Otan partııasynyń Qaraǵandy fılıaly tóraǵasynyń birinshi orynbasary aýysty

QARAǴANDY. QazAqparat – Nur Otan partııasynyń Qaraǵandy fılıalynyń basshylyǵynda ózgerister oryn aldy. Tóraǵanyń birinshi orynbasary bolyp belgili qoǵam qaıratkeri jáne metsenat Bekzat Altynbekov taǵaıyndaldy, dep habarlaıdy QazAqparat tilshisi.

Jańa basshyny fılıal tóraǵasy, Qaraǵandy oblysynyń ákimi Jeńis Qasymbek saıası keńestiń keńeıtilgen otyrysynda tanystyrdy.

«Nur Otan partııasy fılıalynyń saıası keńesiniń, sondaı-aq Ortalyq apparattyń sheshimimen Bekzat Altynbekov oblystyq fılıal tóraǵasynyń birinshi orynbasary bolyp taǵaıyndaldy», - dedi Jeńis Qasymbek.

Osy qyzmetti toǵyz jyl boıy atqarǵan Qadısha Ospanova oblystyq máslıhatqa jumysqa aýysty.

Ol áleýmettik-mádenı damý jáne halyqty áleýmettik qorǵaý jónindegi turaqty komıssııanyń tóraıymy bolyp saılandy.

Jeńis Qasymbek Qadısha Ospanovaǵa atqarǵan jumysy úshin alǵys aıtyp, jańa salada tabys tiledi.

Bekzat Altynbekov 1973 jyly Qaraǵandy oblysynyń Aqtoǵaı aýdanynda dúnıege kelgen. Eńbek jolyn BAQ-ta bastaǵan, «Arqa eńbekkeri» gazetiniń tilshisi, Aqtoǵaı aýdandyq radıostantsııanyń telejúrgizýshisi bolǵan. Sodan keıin kóp jyldar boıy bilim berý salasynda basshylyq laýazymdarda jumys istedi.

Eki ret Jezqazǵan qalalyq máslıhatynyń depýtaty bolyp saılandy. Qazir Qaraǵandy oblystyq máslıhatynyń depýtaty.

Tarıh ǵylymdarynyń kandıdaty. Bilim berý isiniń qurmetti qyzmetkeri. «Altyn júrek» ulttyq syılyǵynyń laýreaty.

2007 jyldyń maýsym aıynan beri Nur Otan partııasynyń qatarynda.