+7 (701) 759 90 19
USD 425.3 EUR 501.05
RUB 5.85 CNY 65.88
Jańalyqtar

Nur Otan: Fılmderdi qazaqsha dýblıajdaý – saılaýaldy ýádeniń bir bóligi

2021 jylǵy 17 maýsym 10:37
Bólisińiz:
Nur Otan: Fılmderdi qazaqsha dýblıajdaý – saılaýaldy ýádeniń bir bóligi

NUR-SULTAN. QazAqparat - Elordada kópten kútken jyl premeralarynyń biri – bolashaqtyqtar qazaq tiline dýblıajdaǵan Pixar stýdııasynyń «Lýka» anımatsııalyq fılminiń aldyn ala kórsetilimi ótti.

Uqsas jańalyqtar
Elimizde fılmniń túpnusqasyn mindetti túrde qazaq tilinde dýblıajdaý talaby engizilmek

Osydan týra 10 jyl buryn 2011 jyldyń maýsym aıynda Elbasy, Tuńǵysh Prezıdent Nursultan Nazarbaevtyń tikeleı qoldaýymen alǵash ret qazaqstandyq kınoprokatqa aǵylshyn tilinen tikeleı qazaq tiline dýblıajdalǵan Disney stýdııasynyń «Kólikter 2» anımatsııalyq fılmi shyqty. Sodan beri elimizdiń kınoteatrlarynda Disney, Pixar, Marvel, Sony Pictures jáne t.b. álemniń jetekshi kınostýdııalarynyń qazaq tiline dýblıajdalǵan 35 fılmi kórsetildi. Jobanyń arqasynda qazaq tili dýblıajda túrik tilinen keıingi ekinshi túrki tili jáne «Walt Disney» kompanııasynyń tarıhynda 39-shy til boldy. 100-den astam otandyq akter «Walt Disney Pictures»-tiń daýystyq bazasyna endi.

«Lýka» mýltfılmi – «Nur Otan» partııasynyń, sondaı-aq demeýshiler men metsenattardyń qoldaýymen júzege asyp jatqan «Ózińnen basta» jobasy aıasynda «Bolashaq» korporatıvtik qory men «Meloman» kompanııasynyń bastamasymen dýblıajdalǵan 37-shi kartına. Jobanyń ıdeıalyq yntalandyrýshysy – «Bolashaq» qory Qamqorshylyq keńesiniń qurmetti múshesi, «Nur Otan» partııasy Tóraǵasynyń Birinshi orynbasary Baýyrjan Baıbek.

«Bıyl «Bolashaq» qory men «Ózińnen basta» fılmderdi dýblıajdaý jobasyna 10 jyl toldy. Atalǵan joba árbir qazaqstandyqtyń ana tilindegi joǵary sapaly sheteldik kınokontentke qoljetimdilik quqyǵyn iske asyrýǵa septigin tıgizýde. Sońǵy jyldary biz joba balalar men eresekterge arnalǵan memlekettik tilde sapaly mýltımedıalyq kontentti qurý boıynsha ulttyq saıasattyń bir bóligi bolý úshin qarqyndy jumys istep jatyrmyz», - dedi «Bolashaq» qory qamqorshylyq keńesiniń tóraıymy Dınara Shaıjúnisova. Ol qordyń kınematografııa máseleleri jónindegi zań jobasyn talqylaıtyn Jumys tobynyń quramyna kiretinin atap ótti. Bul rette anımatsııalyq fılmder jáne otbasymen kórýge arnalǵan fılmderdi dýblıajdaýdy qamtamasyz etýde memlekettik qoldaý sharalaryn keńeıtý – «Nur Otan» partııasynyń saılaýaldy baǵdarlamasyn iske asyrý jónindegi bekitilgen Jol kartasynyń ındıkatorlarynyń biri.

«Biz balalar kontenti men otbasymen kórýge arnalǵan sheteldik fılmderdi dýblıajdaýǵa memlekettik qarjylyq qoldaý kórsetý, praım-taım seanstarynyń ýaqytyn retteý, memlekettik jáne ózge tilderdegi kınoseanstardyń úlesterin bólý, otbasymen kórýge arnalǵan fılmderdiń qazaq tilindegi dýblıajyn prokatqa shyǵaratyn kınoteatrlar úshin salyq preferentsııalaryn engizý máselelerine qatysty birqatar usynystar engizdik. Mádenıet jáne sport mınıstrliginiń ýákiletti organ retindegi mindeti – olardy iske asyrý boıynsha tolyqqandy jaýapkershilik alý», - dep tolyqtyrdy Dınara Shaıjúnisova.

Jalpy, «Nur Otan» baspasóz qyzmetiniń aqparatyna súıensek, bılik partııasy óziniń saılaýaldy ýádelerin iske asyrý aıasynda memlekettik tildiń barlyq salada qoldanylýyn keńeıtýge, qazaq tilinde oqytatyn mektepter men balabaqshalardy kóbeıtýge, sondaı-aq dástúrli mádenıet pen ulttyq sport túrlerin qoldaýdy jalǵastyrýǵa nıetti.

Aldyn ala kórsetilimge «Bolashaq» Qaýymdastyǵy Keńesiniń qurmetti múshesi, Nur-Sultan qalasynyń ákimi Altaı Kólginov te qatysty. «Ózderińiz biletindeı, Elbasy memlekettik tildi damytý úshin, Táýelsizdiktiń alǵashqy jyldarynan bastap eńbek etip keledi. Prezıdent ana tilimizge erekshe kóńil aýdaryp, memlekettik dárejede qoldaý bildirip keledi. Sondyqtan «Bolashaq» Qorynyń «Ózińnen basta» jobasy — qazaq tiliniń damýyna qosqan zor úlesi. Osy maqsatta memlekettik bıýdjetten qarajat bólingen joq, munyń bári demeýshilerdiń arqasynda júzege asty. Biz olarǵa rızashylyq bildiremiz», - dedi Altaı Kólginov.

«Lýka» fılmine kastıngke Nur-Sultan qalasynan 32 akter qatysty. Mamandardyń aıtýynsha, dýblıajdaý kezinde aǵylshyn tilindegi mátin qazaq tiline tikeleı aýdarylyp qana qoımaıdy. Onda tilimizge tán sózder qoldanylyp, ázilder sózbe-sóz aýdarylmaı, ulttyq mádenıettiń erekshelikterin eskere otyryp aýdarylǵan. Mysaly, «Lýka» fılminde maǵynany neǵurlym aıqyn jetkizý úshin «Otpen oınap júrmiz», «Aýzyńa maı, astyńa taı» degen sııaqty taǵy da basqa qazaq frazeologızmderi qoldanyldy.

Fılmniń dýblıaj rejısseri Nazerke Lespekqyzynyń pikirinshe, mundaı málimetter fılmdi balalar úshin ǵana emes, eresekter úshin de túsinikti ári kúlkili etedi. «Dýblıaj jumysynyń qıyndyǵy akterlik sheberlikten kem túspeıdi. Onyń ústine, kishkentaı bólmede, eshqandaı kórermensiz, olardyń qoldaýy men qoshemetinsiz oınaý ońaı emes. Akterlik kásipti endi ǵana meńgerip kele jatqan balalarǵa erekshe qıyn boldy», - dep atap ótti rejısser.

«Lýka» - ıtalıandyq jas rejısser, «Oskar» syılyǵyna úmitker Enrıko Kasarostyń debıýttik taspasy. Kartına álemge áıgili kompozıtor Ennıo Morrıkondy eske alýǵa arnalǵan. Italıandyq Rıveranyń eń jarqyn ásem peızajdary, ulttyq mýzykasy, barlyq keıipkerlerdiń jigerli de qyzýqandy minez-qulqy eshkimdi beıjaı qaldyrmaıdy.

Qazaqstan kınoteatrlarynda fılm búgin, 17 maýsymda qazaq jáne orys tilderinde shyǵady. Al sodan soń «Lýka» ivi jáne Megogo onlaın-kınoteatrlarynda qazaq tilinde kórýge bolatyn sheteldik fılmder toptamasyn tolyqtyrady.


Bizdiń kanalymyzǵa jazylyńyz:

Bólisińiz:

Avtor:

Qanat Mámetqazyuly

Uqsas jańalyqtar
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER

MURAǴAT