Neapol qalasynda Qazaqstannyń Qurmetti konsýldyǵy ashyldy
2022 jylǵy 28 maýsym 07:40

Neapol qalasynda Qazaqstannyń Qurmetti konsýldyǵy ashyldy

NUR-SULTAN. QazAqparat - Neapol qalasynda Qazaqstan Respýblıkasynyń Qurmetti konsýldyǵy ashyldy. QR Qurmetti konsýly laýazymyna ıtalıandyq «SCN» kompanııasynyń basshysy Valentına Matstsa taǵaıyndaldy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Saltanatty ashylý rásimi Qazaqstan Respýblıkasynyń Italııa Respýblıkasyndaǵy Elshisi Erbolat Sembaevtyń qatysýymen ótti.

Elshi óz sózinde Qazaqstan men Italııa arasyndaǵy dıplomatııalyq qarym-qatynastardyń ornaǵanyna 30 jyl tolý qarsańynda atalǵan is-sharany ótkizýdiń sımvoldyq máni bar ekenin aıtty. Sonymen qosa ol Qurmetti konsýldyqtyń ashylýy eki eldiń ekijaqty kún tártibin, sonyń ishinde saýda, ınvestıtsııalyq jáne gýmanıtarlyq baǵyttardy keńeıtý jónindegi saıası erik-jigeriniń kórsetkishi bolyp tabylatynyn atap ótti.

Qazaqstandyq dıplomat mıllıonnan astam halqy bar, sonymen birge damyǵan týrıstik jáne kólik-logıstıkalyq ınfraqurylymymen tanymal Italııanyń úshinshi iri qalasy bolyp tabylatyn Neapoldegi Qurmetti konsýldyqtyń ashylýy Qazaqstan men Italııa arasyndaǵy yntymaqtastyqty damytýǵa yqpal etetinine senim bildirdi.

Óz kezeginde V.Matstsa Qazaqstan Úkimetine senim bildirgeni úshin alǵys aıtyp, eki el arasyndaǵy ózara is-árekettiń áleýetti baǵyttaryn belgiledi. Sóz sóıleý barysynda ol ıtalııalyq kásipkerlerdi qazaqstandyq áriptestermen iskerlik baılanystar ornatý jáne birlesken jobalardy iske asyrý úshin Qurmetti konsýldyqtyń múmkindikterin paıdalanýǵa shaqyrdy.

Keńseniń negizgi fýnktsııasy elimizdiń Kompanııa óńirimen ekonomıkalyq, mádenı-gýmanıtarlyq baılanystardy jolǵa qoıý, sonymen qosa QR azamattarynyń quqyqtaryn qorǵaýǵa járdemdesý bolyp tabylady.

Іs-sharaǵa qala basshylyǵy, jergilikti BAQ jáne bıznes ókilderi qatysty. Rásimge qatysýshylarǵa Qazaqstannyń syrtqy saıası jáne ekonomıkalyq jetistikteri, eldegi saıası reformalar jáne ınvestıtsııalyq ahýaldyń tartymdylyǵy týraly baıandaıtyn aqparattyq materıaldar tabys etildi.



Uqsas jańalyqtar

Jańalyqtar

Úrdis

MURAǴAT