+7 (701) 759 90 19
USD 384.97 EUR 427.12
RUB 6.04 CNY 54.75
Jańalyqtar

Nazgúl Kenjetaı: Álemde soǵys bitkende beıbitshilik jaıynda jazýǵa kóshemin

2019 jylǵy 16 sáýir 14:06
Bólisińiz:
Nazgúl Kenjetaı: Álemde soǵys bitkende beıbitshilik jaıynda jazýǵa kóshemin

QYZYLORDA. QazAqparat - Syr óńirinde dúnıege kelgen saıası jáne áskerı jýrnalıst Nazgúl Kenjetaı búginde halyqaralyq jýrnalıstıkada óz órnegin aıshyqtap úlgerdi.

Árbir jazǵan maqalasy men túsirgen foto sýreti arqyly oqyrmannyń qyzyǵýshylyǵyn týǵyza biletin ol jas ta bolsa únemi izdenistiń arqasynda álemniń qazirgi tynys-tirshiliginiń tamyr búlkilin boıamasyz berýge tyrysady. Ol bıyl elimizdegi «100 jańa esim» respýblıkalyq jobasynyń jeńimpazy atandy. Aldaǵy kúnderde aldyna aýqymdy maqsat qoıǵan Nazgúlmen QazAqparat tilshisi qysqasha oı bólisken edi.

- Nazgúl, ózińdi «100 jańa esim» jobasy jeńimpazy bolýyńmen quttyqtaımyz. Aldaǵy ýaqytta tolaǵaı tabystar tileımiz. Áńgime basynda aldymen óziń jaıynda qysqasha aıta ketkeniń artyq bolmas.

- Men 1995 jyly Qyzylorda qalasynda kópbalaly qarapaıym otbasynda dúnıege keldim. Ákem Tursynbaı Kenjetaı men eki jasqa kelgende, 1997 jyly dúnıeden ozdy. Ol ınjener bolǵan. Anam Bakytgúl Bekmuratova búginde «Jas órken» kolledjinde fızıka páninen muǵalim bolyp qyzmet atqarady. Áriptesteri anamdy tájırıbeli, bilikti ustaz retinde qurmet tutady. Meniń ómirlik ustazym - anam. Anam meni alǵa jeteleı tústi. Aldyma maqsat qoıýdy úıretti. Aıaýly jannyń altyn sózderi men eriksiz senimi maǵan árdaıym qanat bitiredi. Men úıdiń kenjesimin.

- Qıyndyǵy men qyzyǵy qatar júretin jýrnalıstıka mamandyǵyn tańdaýyńa ne áser etti? Onyń ishinde saıası jáne áskerı taqyrypqa qyzyǵýshylyq bildirýińniń sebebi qandaı? Ádette, qyz balasyna bul taqyryp ońaı soqpasy belgili ǵoı.

- Men kishkentaıymnan óleń jattaýǵa qumar boldym. Áli esimde, 4-5 jasymnan Abaıdyń óleńderin jatqa aıtatyn edim. Búginge deıin Abaı óleńderine qyzyǵýshylyǵym erekshe. Mirjaqyptyń «Oıan qazaǵymen» de rýxtanyp kelemin. Kishkentaıymnan úlkenderdiń meni jýrnalıst bolady degen sózderi jadymda qaldy. Keıin basqa mamandyq jaıly oılaı almaıtyn dárejege jettim. 2013 jyly Túrkııanyń memlekettik grantyn jeńip alyp, sol elde jýrnalıstıka fakýltetinde bilim alyp shyqtym. Munda sol fakýltetti bitirip shyqqan jýrnalıster jerde qalmaıdy. Árbir professor stýdenttiń maman retinde jetilýin mańyzdy dep biledi. Az uıyqtap, kóp úırendim. Sol arqyly 5 jylda ózim úshin kóp nárse úırendim dep aıta alamyn. Ustazdarymnyń keńesimen áskerı jáne saıası jýrnalıstıkany tańdadym. Kóptegen synaqtan óttim. Saıası taqyrypta alǵyrlyǵymdy baıqaǵan professorlar arnaıy tapsyrmalar bere bastady.

- Endigi kezekte atalmysh taqyryptar boıynsha qandaı izdenister jasaǵanyńdy aıta ketseń... Sebebi, bul taqyrypqa árbir jýrnalıst qalam tarta bermeıdi. Ol zerdeli zertteý jasaǵandy qajet etedi emes pe?

- Saıası qaqtyǵystar jaıynda aıta ketsem, muǵalimderdiń synaǵynan súrinbeı ótip, olardyń favorıt stýdentteriniń birine aınaldym. Keıin qaqtyǵystardy jaqynnan zertteý kerektigin túsindim. Kózben kórmegen jaǵdaıdyń 90 paıyzy ótirik. Al siz jazǵan materıalyńyzdy sýret vıdeo arqyly dáleldeseńiz, úlken jetistik. Osylaısha, qaqtyǵys bolyp jatqan jerlerdi jaqynnan zertteýge múmkindik aldym. Árıne, áskerı jaǵdaı qıyn. Degenmen bul - meniń jumysym, tek qana jumys emes, bildeı bir qoǵamnyń taǵdyry. Eń aldymen, kez kelgen áskerı qaqtyǵysta adam tek bir nárseni oılaıdy. Ol jerden qalaı aman shyǵam degen oı ǵana bolady. Kóptegen bosqyndardyń sharasyzdyǵyn kórip, shúkir etesiń. Olardyń janaıqaıyna ortaq bolyp barynsha kómekteskiń keledi. Ol shyndyqty kórgen árkim beı-jaı qaraı almaıdy.

- Jýrnalıstıkanyń atalmysh baǵytyn tańdaýyńa otbasyń qalaı qarady? Qarsylyq bildirgen joq pa ?

- Otbasym meniń sheshimimdi árdaıym qoldaıdy, syılastyqpen qaraıdy. Maǵan senedi. Men de olardyń senimin aqtaý úshin eki ese artyq eńbek etip jatyrmyn. Bolashaqta óz medıamdy qursam deımin. Qazaqstannyń álemge degen óz qózqarasyn tanytsam degen oıym bar. Áskerı jýrnalıst retinde qyzmetimdi jalǵastyra beremin. Álemde soǵys bitken kezde men de beıbitshilikti jazýǵa kóshemin. Biraq, ókinishke qaraı, ázirge bul múmkin emes. Osy jyly áskerı jýrnalıst retinde kóptegen mańyzdy jobam bar. Álem jýrnalıstıkasynan bizdiń elimizdiń úıreneri óte kóp dep sanaımyn. Sebebi, biz jýrnalıstıkanyń qyr-syryn áli tolyq tanı aldyq deýge erte. Áli kúnge deıin korrespondentsııa men jýrnalıstıkanyń aıyrmashylyǵyn ajyrata almaı júrgender bar. Ózindik pikir aıtýǵa kelgende shorqaq ekenimizdi jasyra almaımyz. Biz kóbinese kóshirýden árige asa almaı kelemiz. Biz jańalyqty alǵashqy bolyp alýǵa tyryspaımyz. Osy qatelerdi túzetý úshin halyqaralyq medıa qurýdy josparlap otyrmyn. Bul baǵytta qalaı jumys isteý kerek ekeni jónindegi saýaldarǵa sol jobam arqyly jaýap berýge nıet tanytyp otyrmyn.

- Týǵan topyraqqa jıi kelip turasyń ba? Syr óńiri ózińdi qandaı ereksheligimen baýrap alady?

- Sátin salsa, týǵan jerge jylyna bir-eki ret kelip ketýge tyrysamyn. Árıne, ózimniń qutty mekenimniń aýasy da, tasy da, sýy da ózgeshe. Kim ekenimdi, qaıdan shyqqandyǵymdy eske túsiredi. Álem dúrbeleńinen sharshaǵanymda týǵan jerdiń aýasy maǵan dárideı keledi. Týǵan jerdiń barlyq jeri - maǵan qutty meken. Elimniń árbir qara topyraǵy men úshin qadirli, qasıetti. Elge kelgenimde moınymdaǵy jaýapkershilikti sezinemin. Ol - elimniń, otbasymnyń aldyndaǵy jaýapkershilik. Qaıtsem osy elge paıdam tıer dep júrgen Alashtyń janashyrymyn.

Bizdiń kanalymyzǵa jazylyńyz:

Bólisińiz:

Avtor:

Ádiljan Úmbet

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Bakytjan Erbasov
Bakytjan Erbasov
954-059

MURAǴAT