Naýryzda jaıaý jolǵa shyqqan 72 jastaǵy aqsaqal elordaǵa deıin 4 myń shaqyrym júrip ótti
2022 jylǵy 7 shilde 14:30

Naýryzda jaıaý jolǵa shyqqan 72 jastaǵy aqsaqal elordaǵa deıin 4 myń shaqyrym júrip ótti

NUR-SULTAN. QazAqparat – 72 jastaǵy Sársenbaı Qotyrashov Qazaqstandy jaıaý aralap júr. Saparyn «Ulytaýǵa bardyń ba?» dep atap, jolǵa bıyl 31 naýryzda shyqqan. Búgin saıahatshy aqsaqal elordaǵa jetti, dep habarlaıdy QazAqparat tilshisi.

«Meniń jaıaý saparym bıyl 31 naýryzda Ulytaýdan bastaldy. Eldi jaıaý aralaýdaǵy úsh maqsatym bar. Birinshiden, Ulytaýdyń qazaq tarıhynda erekshe ról atqaratynyn kópshilikke nasıhattaý. Ekinshi maqsatym – Qazaqstandaǵy qolóner sheberleriniń tizimin jasaqtaý. Olarmen kezdesip, bas qosý. Úshinshi, umyt bolyp bara jatqan ulttyq qymyzmuryndyq meıramyn qaıta dáriptep, elge mańyzyn túsindirý. Allanyń bergen qýaty men halyqtyń qoldaýynyń arqasynda kúnnen kúnge shırap kelemin», - dedi Sársenbaı Qotyrashov.

72 jasar aqsaqal elordaǵa deıin 4 myń shaqyrymdy jaıaý baǵyndyryp otyr. Naýryzdan beri Qyzylorda, Túrkistan, Shymkent, Taraz, Almaty, Qonaev, Taldyqorǵan, Aıagóz, Semeı, Óskemen, Pavlodar, Qaraǵandy qalalarynda bolǵan.

«Beınetsiz eńbek joq deıdi. Jol-jónekeı azdaǵan qıynshylyqtar boldy. Arbam synyp qalyp, aıaq kıimim tozyp qaldy. Synyp qalǵan arbany súıretip kele jatqanymdy kórgen bir kisi úıine shaqyryp, arbamdy dánekerlep, qondyryp, qonaq etip shyǵaryp saldy. Bul arbamen shatyr, tósek-oryn, kerek-jaraq quraldar jáne tamaǵymdy alyp júrmin. Jalpy salmaǵy - 60 keli. Jolda tamaqtan qınalǵan emespin. Qazaq halqy darhan ǵoı. Jol-jónekeı kezdesken azamattar tamaǵyń, sýyń bar ma dep surap, salyp berip jatty. Alla qýat bersek, aldaǵy maqsat – Mekkege jaıaý barý», - deıdi ol.

Sársenbaı atamyz eldi jaıaý aralaýdy burynnan josparlaǵan.

«Basynda jaqyndarym «jasyń bolsa 70-ten asty, ne isteısiń jaıaý júrip, odan da densaýlyǵyńdy kút» dedi. Keıin úsh maqsatymdy aıtqan soń, olar ruqsatyn berip shyǵaryp saldy. Jolda qarańǵy túspeı eldimekenge jetsem, sonda qonyp júrdim. Al ıen dalada qalyp qoısam tigetin shatyrym bar», - dedi jolaýshy.

Alda saıahatshy atamyzdy taǵy 4 myń shaqyrym jol kútip tur. Atap aıtqanda, elordadan Kókshetaý, Petropavl, Qostanaı, Aqtóbe, Oral, Atyraý, odan ári Aqtaýǵa jetip, sonda saparyn aıaqtamaq.

Jolaýshy aqsaqaldy elordada bir top qoldaýshylary kútip aldy. Olar shashý shashyp, ataǵa shapan jaýyp, odan ári saparyna sáttilik tiledi.

Aıta ketsek, Sársenbaı Qotyrashov búgin keshke elordadaǵy «Qazaqkontsert» ortalyǵynda ótetin kontsertke qatysyp, sol jerde jergilikti qolóner sheberlerimen kezdesý ótkizedi.

Eske salsaq, buǵan deıin ulytaýlyq 72 jastaǵy qarttyń jaıaý marafonǵa attanǵanyn habarlaǵan edik.


Seriktester jańalyqtary

Jańalyqtar

Úrdis

MURAǴAT