Múlik salyǵyn tólemeı júrgen turǵyndary kóp 5 oblys ataldy

2022 jylǵy 26 qyrkúıek, 19:46
Múlik salyǵyn tólemeı júrgen turǵyndary kóp 5 oblys ataldy

ASTANA. QazAqparat - Memlekettik kirister komıteti múlik salyǵyn tólemeıtinderdiń eń kóp sany bar oblystardyń antıreıtıngin jasady, dep habarlaıdy QazAqparat.

2022 jyldyń 1 qazanynda jyljymaıtyn múlik jáne jer ýchaskeleriniń menshik ıeleriniń 2021 jylǵa eseptelgen múlik salyǵyn tóleý merzimi aıaqtalady.

Búgingi tańda Qazaqstanda múlik salyǵyn tólemegen jeke tulǵalardyń eń kóp sany shoǵyrlanǵan 5 oblysy mynadaı:

1. Almaty oblysy-179 820;

2. Qaraǵandy oblysy -139 498;

3. ShQO-135 056;

4. Túrkistan oblysy-129 339;

5. Shymkent qalasy-120 456.

2022 jyldyń 2 qazanynan bastap jeke tulǵalardyń salyq bereshegi týraly habarlamalardy boryshkerlerge jiberetinin eske salady.

1 aılyq eseptik kórsetkishten astam bereshek somalary boıynsha habarlama tabys etilgen soń otyz jumys kúninen keıin bereshekti májbúrlep óndirip alý týraly salyq buıryǵy jiberiledi. Bul salyq buıryǵy 5 jumys kúni ótkennen keıin jeke sot oryndaýshylaryna májbúrlep óndirip alý úshin beriledi.

Sonymen qatar 40 AEK-ten qaryz bolǵan jaǵdaıda azamatqa Qazaqstannan ketýge tyıym salynýy múmkin.

Bul rette, jeke sot oryndaýshylary bereshek somasynan basqa shottarǵa tyıym salý jáne shyǵýǵa shekteý qoıýdan týyndaǵan qolaısyzdyqtar týraly aıtpaǵanda, salyq bereshegi somasynyń 25%-na deıingi mólsherde qosymsha tólemdi óndirip alady.

Osylaısha, artyq shyǵyndar men problemalardy boldyrmaý úshin múlik salyǵyn ýaqytyly tóleýge keńes beremiz.

Salyqty «e-Salyq Azamat» jáne ekinshi deńgeıdegi bankterdiń mobıldi qosymshalary, «Elektrondyq úkimet» portaly arqyly, ekinshi deńgeıdegi bankterdiń bólimsherindegi nemese tólem termınaldaryndaǵy qolma-qol aqsha qarajatymen, sondaı-aq bankomattar men tólem termınaldaryndaǵy bank kartalary arqyly tóleýge bolady.

Aıta ketsek, salyq bereshegi bolǵan kezde bankter jeke tulǵalarǵa bank shottaryn ashýdan bas tartýǵa mindetti. Bul shottarǵa járdemaqylar, áleýmettik tólemder, zeınetaqylar, alımentter alýǵa arnalǵan bank shottaryn, sondaı-aq bilim berý jınaqtaý salymy týraly shart boıynsha ashylatyn bank shottary jatpaıdy.


Seriktester jańalyqtary

Jańalyqtar

https://www.inform.kz/qz/mulik-salygyn-tolemey-zhurgen-turgyndary-kop-5-oblys-ataldy_a3983468
https://www.inform.kz/qz/mulik-salygyn-tolemey-zhurgen-turgyndary-kop-5-oblys-ataldy_a3983468