+7 (701) 759 90 19
USD 425.75 EUR 499.32
RUB 5.85 CNY 65.88
Jańalyqtar

Muhtar Káribaı: Uly dalanyń jeti qyryn tanytý - paryz

2020 jylǵy 17 jeltoqsan 15:52
Bólisińiz:
Muhtar Káribaı: Uly dalanyń jeti qyryn tanytý - paryz

NUR-SULTAN. QazAqparat - Táýelsizdiktiń alǵashqy jylynda-aq arystarymyzdyń amanatyn oryndaý, Abaıdyń qalyń eli qazaǵynyń dúnıejúzilik qoǵamdastyqtaǵy óz ornyn alýy, taǵdyry tereń Uly dalanyń jeti qyryn tanytý mindeti turdy. Mundaı pikirdi dıplomat, pýblıtsıst Muhtar Káribaı bildirdi, dep habarlaıdy QazAqparat tilshisi.

«Biz ókiline jatatyn urpaqtyń mańdaıyna qasıetti halqymyzdyń tarıh muhıtynyń asaý tolqyndary men dúleı daýyldaryna talaı tap bolsa da, ádilet jolynan taımaı, aınymaı da adaspaı udaıy alǵa basyp, asyl tekti babalar muraty - qasterli Táýelsizdigine qol jetkizgen kezeńine kýá bolýdyń baǵy buıyrdy. Egemendiktiń eńsesin tikteý, qazany burq-sarq qaınaǵan halyqaralyq qoǵamdastyqqa derbes múshe retinde qadam basqan elimizdiń jahan jurtyna moıyndalýynyń uly mıssııasyna kirisken Prezıdent N.Nazarbaev jańadan qurylǵan Syrtqy ister mınıstrligine barynsha aýqymdy mindetter júktep, bilikti kadrlerdi irikteı kele, bul salada jyraqta júrgen qazaqtyń ul-qyzdaryn túgel elge shaqyrtty. Eti tiri polıteh pen «ınıazdyń» jigitterinen qalyspaı, QazMÝ-dyń shyǵystaný fakýltetiniń túlegi, arab tiliniń mamany bolǵandyqtan biz de 1992 jyly qazanda mınıstrlikke jumysqa qabyldandyq. Ýnıversıtettiń sońǵy kýrstarynda Ahmet Baıtursynov, Álıhan Bókeıhanov, Mirjaqyp Dýlatov syndy Alash qaıratkerleri aqtalyp, ǵumyryn ult azattyǵyna, áleýmettik kóterilýine arnaǵan tulǵalardyń bútindeı bir dáýir múlde jabyq bolyp kelgen uly murasynan sýsyndaý múmkindigi týǵan edi. Sondyqtan aldymyzda bizge deıingi san urpaqtyń, arpalysyp ótken arystarymyzdyń amanatyn oryndaý, Abaıdyń qalyń eli qazaǵynyń dúnıejúzilik qoǵamdastyqtaǵy óz ornyn alýy, taǵdyry tereń Uly dalanyń jeti qyryn tanytý mindeti turdy», - deıdi dıplomat.

Onyń aıtýynsha, azattyqtyń alǵashqy jyldary jańa mınıstrliktiń irgesin qalap, órkenıetti jolǵa salý respýblıkaǵa tanymal, bedeldi, tájirıbeli qoǵam qaıratkerleri Aqmaral Arystanbekova, Tóleýtaı Súleımenov, Qanat Saýdabaevtaı azamattarǵa senip tapsyrylǵan.

«Aǵa urpaqtyń sharapatymen endigi bıik mártebege jetip, mınıstr, elshi, álemdik uıymdardaǵy ókil laýazymdaryn atqaryp otyrǵan dıplomattarymyzdyń balań murtty, jasyl jelekti bastapqy býyny da sol kezeńde qalyptasty. Búginde topshysy bekigen otandyq dıplomatııanyń kásibı hám zııalylyq kelbetiniń ornyǵyp nyǵaıýy Qasym-Jomart Kemelulynyń esimimen tyǵyz baılanysty. Syrtqy saıasat vedomstvosyn uzaǵynan eki márte basqarǵan jyldary Q.Toqaevtyń jumys tásili kúndelikti qaýyrt sharalardyń ózin mazmundy, taǵlymdy oqıǵaǵa ulastyrýymen birge, qalamy qarymdy mınıstrdiń qolynan shyqqan salmaqty týyndylary halyqaralyq qatynastar salasynyń kúrdeli ıirimderin kórneki de kórkem jetkizgen sheberlik mektebine aınalǵany shyndyq. Dıplomat jaza bilýi kerektigin boıymyzǵa bekitken de osy eńbekter edi», - deıdi Muhtar Káribaı.

Osy oraıda dıplomat Alashtyń asyl perzenti Mustafa Shoqaı «Jaman halyq degen joq, jaman adamdar bar, adamgershiligi mol memleket degen bolmaıdy, adamgershiligi mol adamdar bolady» dep jıi aıtqanyn eske alady.

«Demek, kásibı dıplomatııa degenimizdiń ózi ózge memleketterdegi adamgershiligi mol áriptesterdi tanı bilip, olarmen til tabysý amaldaryn tabýda bolsa kerek. Qadyr aǵamyz ósıet etkendeı, «óz tilińdi qurmetteı otyryp, ózge tildiń bárin bilýiń», endeshe ǵumyr boıy izdený, oqý, zertteý, taldaýyń mindetti, árıne! Aıtyp ótkenimdeı, qara shańyraq qabyrǵasynda qazaq fılologııasy, shyǵystaný baǵytynda áıgili ǵalym ustazdardyń aldyn kórgen bilimimiz ózektilikpen iske jarap, syrtqysaıası mekeme aıasyndaǵy alǵashqy halyqaralyq qujattardy, berisin aıtqanda tuńǵysh dıplomatııalyq, qyzmettik pasporttardyń, vızalardyń memlekettik tildegi mátinderin ázirlep, alǵashqy ereje, nusqaýlyqtardy daıyndaý isinde nátıjeli jemisin berdi», - deıdi ol.

Onyń atap ótýinshe, ózge saladan dıplomatııalyq qyzmettiń ózindik ereksheligi - shet memleketterge uzaqmerzimdi issaparǵa attaný.

«Meniń alǵashqy saparym Alataý bókterindegi Qyrǵyz elinde ótip, ol ýaqtaǵy elshimiz áıgili aqyn, qaıratker Muhtar Shahanovpen qyzmettes bolýdyń oraıy keldi. Qaltarysy kóp konsýldyq bólimge jaýapty bola júre, saıası laýazymdy ádebıet pen mádenıet qazanynda bite qaınatqan biregeı Muhańnyń qolqasymen kún-tún demeı irgeles Almatydan aǵylyp jatatyn ulttyq óner, rýhanııat ókilderiniń barshasymen derlik tyǵyz aralasýdyń múmkindigi óz aldyna, Bishkekte dúnıege kelgen ulymyzǵa adamzattyń Aıtmatovy aǵamyzdyń batasyn alyp, Shyńǵys esimin berip, ataqty týyndylarynyń biri «Kassandra tańbasy» kitabyna jazyp bergen qoltańbasy aıryqsha qymbat dúnıe retinde jeke kitaphanymda saqtaýly. Birinshi saparda-aq dıplomat jumysy aq kóılek kıip, kelissóz ústelinde otyrýdy ǵana bildirmeıtinine ábden kóz jetkendikten, biliktilikti kóterý nıetimizben shákirt qalypqa qaıta túsip, balamyz mektepke, ózimiz akademııaǵa sabaqqa birge ketetin kezeń de ótken. Osylaısha, meniń zamandastarym eńbek jolyn táýelsizdikpen birge bastap, kóbinese jaldamaly páterde jabyrqaı júrse de jasymaı qyzmet atqaryp, minekı jyldar óte búginde barlyq derlik salanyń kadrlyq negizin qurap turǵan úlken strategııalyq býynnyń qazirgi keıde arasynda «joǵalǵan býyn» uǵymyna jatqyzyla bastaýy da alańdatady», - deıdi pýblıtsıst.

Sonymen qatar ol oraıy kelgen sátti paıdalanyp, otandyq dıplomattar qaýymyn tól merekemizben quttyqtap ótti.

«Oraıly sátti paıdalanyp, keıde ǵasyrdan da uzaq kórinetindeı qysqa merzimde elimizdiń irgesi bekip, adamzat qoǵamdastyǵynyń qabyrǵaly múshesine aınalyp, eńsesi bıiktep abyroıy arta túsýiniń alqaly isine qomaqty úles qosyp kele jatqan otandyq dıplomattar qaýymyn Qazaqstan Táýelsizdiginiń 30 jyldyǵy merekesimen izgi nıeti quttyqtaýymdy joldaımyn!», - deıdi Muhtar Káribaı.



Foto: adebiportal.kz

Bizdiń kanalymyzǵa jazylyńyz:

Bólisińiz:

Avtor:

Marlan Jıembaı

Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janat Qapalbaeva
Janat Qapalbaeva
954-059

MURAǴAT