+7 (701) 759 90 19
USD 439.01 EUR 474.61
RUB 5.75 CNY 61.91
Jańalyqtar

Múgedek arbasy armanǵa jetýge kedergi bola almaıdy - Erlan Ádilbekov

2020 jylǵy 7 aqpan 14:12
Bólisińiz:
Múgedek arbasy armanǵa jetýge kedergi bola almaıdy - Erlan Ádilbekov

NUR-SULTAN. QazAqparat - Ózine ǵana emes, ózgelerge de qol ushyn sozý. І top múgedegi Erlan Ádilbekov osyndaı joldy tańdaǵan. Ol omyrtqa zaqymyn, ınsýlt alǵan jáne sal aýrýyna shaldyqqan adamdardy ońaltý jumystarymen aınalysady.

Uqsas jańalyqtar

Erlan Ádilbekov 2019 jyly maýsym aıynda «Start» sporttyq-saýyqtyrý ortalyǵyn ashqan.

«2018 jyly bul ortalyqty úsh aıǵa pılottyq rejımde ashyp, qalaı jumys isteý kerek ekenin túsinip aldyq. Ózim de osy joldan ótkendikten, saýyqtyrý jumystaryna qatysty úlken tájirıbem bar. Jańa jylǵa deıin 20-ǵa jýyq adam ortalyqta em aldy. Em alýshylardyń keıbiriniń janynda kútýshileri boldy. Bul ortalyqty tolyqtaı óz qarajatyma ashyp, tósek-oryn, stol, oryndyq jáne sport tehnıkalarymen jabdyqtadym. Elimizde 12 kún ǵana ońaltý jumysyn júrgizetin ortalyqtar kóp, biraq 12 kún em alýdyń esh máni joq. Tolyq emdelý úshin turaqty túrde emdik fızıkalyq shynyǵýmen aınalysý kerek», - deıdi ońaltý ortalyǵynyń basshysy.

Erlan Ádilbekov Semeı qalasynda ómirge kelip, 2013 jyly elordaǵa kóship kelgen.

2002 jyly ol ózende júzip júrgende moıyn omyrtqasyn syndyryp alǵan. Sonyń saldarynan eki aıaǵy men eki qoly tolyq sal bolyp qalǵan. Qıyn sátte Erlan aǵaǵa otbasy tireý bolǵan. Onyń baýyry sol oqıǵadan beri aǵasynyń qasynan tabylyp, qoldaý bildirip keledi.

«Qaıǵyly jaǵdaıdan keıin alǵashqy alty jyl boıy tósek tartyp jattym. Sol kezde múgedekter arbasyna otyrýdy armandap, elordaǵa ketýdi maqsat ettim. Maqsatyma jetý úshin «Programmıst-tehnık» mamandyǵy boıynsha eki jarym jyl kolledjde qashyqtyqtan oqyp, dıplom aldym. Odan keıin elektrondy úkimette jumys istep, jeke kásipker bolyp, memlekettik satyp alý jáne tendermen aınalystym», - deıdi ol.

Ýaqyt óte kele ol óz tájirıbesin bólisý maqsatynda ońaltý ortalyǵyn ashý týraly sheshim qabyldaıdy. Bul ortalyqta ońaltý jumystarymen aınalysyp qana qoımaı, orta jáne joǵary oqý ornyna túsýge kómeýtesip, trenıngter ótkizip, jergilikti atqarýshy organdarmen birlese otyryp jumysqa ornalasýǵa kómektesedi.

Atalǵan ortalyqta jattyǵý zaly, massajǵa arnalǵan bólme, kir jýatyn, tamaq isteıtin jáne uıyqtaıtyn bólme bar.

«Tańerteń ortalyqta jatqan adamdar emdik dene shynyqtyrýmen aınalysady. Kúnine eki ret nusqaýshymen birge jekeleı jumys júrgiziledi. Ortalyǵymyzǵa Pavlodar, Ekibastuz, Qyzylorda, Aqtaý, Atyraý, Semeı, Almaty, Balqash, Kókshetaý, Qaraǵandydan kelip emdeledi. Kóbine omyrtqa zaqymy, sal aýrýy jáne ınsýlt dıagnozy boıynsha keledi. Mysaly, ı nsýlt alǵan adamdy jattyǵý zalyna almaıdy. Olardyń denesiniń bir jaq bóligi jansyzdanyp qalatyndyqtan, árqaısysymen erekshelikterine qaraı jekeleı jumys isteımiz. Bizge kóbine aýrýhanadan em alyp bolǵan, endigi emdik dene shynyqtyrýdy qajet etetin adamdar keledi. Aıyna 120 myń teńge tóleıdi, oǵan ortalyqta turý men tamaqtanýy kiredi», - deıdi Erjan Ádilbekov.

Ol etken eńbegi jemisin bere bastaǵanyn aıtty.

«Mysal retinde aıtar bolsam, bizge Almatydan bir áıel keldi. Ol eki ret ınsýlt alǵan, múgedekter arbasynda otyrdy. Biz ony tórt aı ishinde aıaqqa turǵyzdyq. Ol arnaıy tirek arqyly óz betimen qozǵalyp, júre alady. Jaqynda ǵana ony Almatyǵa shyǵaryp saldyq, endi bir aıdan keıin tolyq emdelý úshin qaıta keledi. Taǵy bir mysal, 21 jastaǵy bozbala qoly tolyq jansyzdanǵan kúıde keldi. Bizdiń ortalyqtaǵy nusqaýshylardyń arqasynda ol úsh aı ishinde qolyn qozǵalta alatyn dárejege jetti», - deıdi ol.

Olar úshin basty nárse - nátıje.

«Bizge tehnıkalyq jaǵynan kómekteskender, jıhaz syılaǵandar boldy. Jumys isteı bastaǵan 6 aı ishinde elimizde mundaı ortalyq qajet ekeni aıqyndaldy. Ol densaýlyq jaǵdaıyna baılanysty kómekke muqtaj adamdardyń ómirge beıimdelýine kómektesedi», - deıdi ortalyq basshysy.

Ol ortalyqqa kelgen ár adammen jeke áńgimelesetinin aıtty.

«Bizge ártúrli jastaǵy adamdar keledi. Ár naýqaspen jeke-jeke sóılesemin. Olarǵa úıge qamalýǵa bolmaıtynyn, ár sátti baǵalaý kerek ekenin aıtamyn. Úıde tapjylmaı jatyp, saýyǵyp ketýdi armandaıtyndar bar. Ony armandaýdyń ornyna, áreket etý kerek ekenin aıtamyn. Bizde múgedek arbasynda otyryp-aq turmysqa shyǵyp, baqytty ǵumyr keship jatqan qyzymyz bar. Eger adamnyń nıeti men talpynysy bolsa, múgedek bolǵanyna qaramastan talaı bıikti baǵyndyryp, bıznespen de aınalysyp, saıahattaı da alady. Múgedekter arbasy armanǵa jetýge kedergi emes», - deıdi ol.

Erlan aǵanyń aıtýynsha, bul jumys ózine shabyt syılaıdy.

«Men bir orynda otyra almaımyn. Únemi qozǵalysta júrip úırenip qalǵanmyn. Qazirgi jumysym kóńilimnen shyǵady. Aldyńa kelgen adamnyń densaýlyǵy jaqsaryp, nátıje kórsetken kezde janym tynyshtalyp, adamdarǵa kómektese alǵanym úshin shúkir etem», - deıdi ol.


Bizdiń kanalymyzǵa jazylyńyz:

Basty sózder: Qoǵam, Áleýmettik qoldaý,
Bólisińiz:

Avtor:

Zarına Qaharman

Zagrýzka...
Pikir qaldyrý
+7
Jiberý
Sondaı-aq... oqyńyz
Zagrýzka...
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Jarylqasyn Saıagúl
Jarylqasyn Saıagúl
954-059
REDAKTOR
Altynbek Kýmarzak
Altynbek Kýmarzak
954-059

MURAǴAT