Mońǵolııada eki qandasymyzǵa eń joǵary memlekettik ataq berildi - Sheteldegi qazaq tildi BAQ-qa sholý
2021 jylǵy 26 jeltoqsan 13:00

Mońǵolııada eki qandasymyzǵa eń joǵary memlekettik ataq berildi - Sheteldegi qazaq tildi BAQ-qa sholý

NUR-SULTAN. QazAqparat - «QazAqparat» HAA ádettegideı sheteldegi qazaq tilinde taraıtyn aqparat kózderine aptalyq sholýyn usynady.

Ózbek jáne qazaq jastary «Saıhýn» festıvaline qatysty - «ÓzA»

Syrdarııada Ózbekstan jáne Qazaqstan jastarynyń qatysýynda «Saıhýn» festıvali ótip jatyr.

Forýmǵa qatysýshylar Túrki jurtynyń uly aqyny hám shyǵystyń oıshyl danyshpany Álisher Naýaı músinine gúl shoqtaryn qoıdy. Oblystyq mýzykalyq drama teatrynyń foıesinde ózbek-qazaq halyqtarynyń tarıhy men qundylyqtary týraly tusaýkeser ótip, shara «Dostyq kópiri» atty kontserttik baǵdarlamaǵa ulasty, dep habarlady «ÓzA» memlekettik aqparat agenttigi.

Atalǵan BAQ-tyń keltirgen deregine súıensek, osy sharadan soń oblys ákimi, senator Gafýrjon Mırzaev qazaqstandyq qonaqtarmen kezdesý ótkizdi. Onda ol Syrdarııa aýdanynda atqarylyp jatqan aýqymdy jumystar, kórshiles eldermen barlyq salada baılanysty nyǵaıtý sharalary, Ózbekstan men Qazaqstan arasyndaǵy dostyq pen yntymaqtastyq qarym-qatynastary týraly málimet berdi.

Kezdesýden soń jas ónerpazdar eki halyqtyń shyǵarmashylyǵynan jyr músháırasyn uıymdastyryp, dostyq saıys ótkizdi.

Kezdesý sońynda qazaqstandyq qonaqtarǵa «Dostyq» forýmynyń músini men estelik syılyqtary tabys etildi.

Qazaqstan Túrkııaǵa kitap syılady - TRT

Qazaqstannyń Túrkııadaǵy ókiletti jáne tótenshe elshisi Abzal Saparbekuly kitapty syılaý rásimine qatysty. Qazaqstan prezıdenti Qasym-Jomart Toqaevtyń eńbekterin de qamtyǵan qazaq ádebıetiniń 200-den astam eńbegi Prezıdenttik Saraı Ulttyq kitaphanasyna syıǵa tartyldy, dep habarlaıdy Túrkııa radıo televızııa portaly.

Qazaqstan táýelsizdiginiń 30 jyldyǵy is-sharalary aıasynda Qazaqstan Túrkııa Respýblıkasy Prezıdenttik Saraı Ulttyq kitaphanasyna syıǵa tartqan qazaq ádebıetiniń 200-den astam eńbegin tapsyryp berý sharasy bas qala Ankarada uıymdastyryldy.

Rásimge Qazaqstannyń Túrkııadaǵy ókiletti jáne tótenshe elshisi Abzal Saparbekuly, Qazaqstan Ulttyq Akademııalyq kitaphanasynyń tóraıymy Úmithan Muńalbaeva, Prezıdenttik Saraı Ulttyq kitaphanasy basqarmasynyń tóraǵasy Aıhan Týǵlý jáne basqada qonaqtar qatysty.

Elshi Abzal Saparbekuly Prezıdenttik Saraı ulttyq kitaphanasyna tapsyrylatyn kitaptardyń Qazaqstan men Túrkııa arasyndaǵy ádebı jáne gýmanıtarlyq baılanystardy kúsheıtýge, qazaq jáne túrik halyqtary arasyndaǵy baýyrlastyqty bekemdeýge ese qosatynyn aıtqan.

Qazaqstan Ulttyq Akademııalyq kitaphanasynyń tóraıymy Úmithan Muńalbaeva atalmysh kitaptardy Túrkııaǵa usyný ózderi úshin mańyzdy bir mindet sanalatynyn, sondaı-aq, Túrki tildes elderdiń berekesin buzbaı, baýyrlas túrik halyqtarynyń ádebıeti men mádenıetin jalǵastyrý maqsatynda ekenin tilge tıek etken.

Baıandamalardan keıin kitaptar tapsyrylǵan.

Ejelgi Jibek jolynyń boıyndaǵy álemdegi eń úlken kirpish ǵımarat - Parstoday

Bam qamaly - álemdegi eń úlken kirpish ǵımarat jáne Irannyń eń mańyzdy tarıhı jádigerleriniń biri, dep habarlaıdy ırandyq Parstoday aqparat agenttigi.

Bul úlken tarıhı keshen Kerman oblysyndaǵy Bam qalasynyń mańyndaǵy úlken jartastyń ústine salynǵan. Qala Ahemenıdter dáýirinen bastaý alady jáne onyń mańyzdylyǵy ejelgi Jibek jolynyń boıynda ornalasýyna baılanysty eken.

Rızabek Jazıdoldauly halyqaralyq «Turan» syılyǵynyń laýreaty atandy- Kaznews

Rızabek Jazıdoldauly 2021 jylǵy Beıneleý óneri salasy boıynsha halyqaralyq «Turan» syılyǵynyń laýreaty atandy, dep málimdeıdi kaznews .

Atalǵan BAQ-tyń dereginshe, halyqaralyq «Turan» syılyǵyna Mońǵolııa, Qazaqstan, Ózbekstan, Ázerbaıjan, Moldava, Reseı, Qyrǵyzstan, Túrikmenstan qatarly elderdiń sýretshileri qatysqan.

«Rızabek Jazıdoldauly taqyryptyq kompozıtsııalaryn kórkemdik rásimmen jandandyryp, romantıkalyq týyndylarynda emotsııalyq sezimder bere biledi. Tarıhtyń bir túıininen poetıkalyq oı tolǵap, deregine úlken fılosofııalyq, sımvolıkalyq oı júgirtedi. Obrazdy oılaýda tıptik qasıet darytýǵa sheber», dep jazady kaznews.mn.

Aıta keteıik, Rızabek Jazıdoldauly Baı-ólke aımaǵynda týǵan Mońǵolııa azamaty. Ol buǵan deıin temirden túıin túıip, altynmen aptap, kúmispen kúptep kise-beldik, áshekeıli syrǵa-júzik, bolatty balqytyp qanjar-pyshaq jasaıtyn ónerimen áıgili bolǵan. Rızabek 1979 jyly dúnıege kelgen. 1997 jyly orta mektepti bitirgen ol el astanasy Ulanbatyr qalasyna baryp, pedagogıkalyq ýnıversıtettiń kórkem sýret fakýltetinde bilim alǵan.

Er jasaýdy kásip etken qazaq – «Halyq Gazeti»

Nurek Jumadiluly er jasaý kásibimen aınalysady, ol tek osy kásibimen jaqsy kiris kirgizip, óz otbasyn asyrap otyr, dep jazady Qytaıdyń people.cn aqparattyq portaly.

Qazaq ulty atqumar halyq, soǵan sáıkes at ábzelderin jasaý kásibi de qazaq arasynda jaqsy damyǵan. Nurek Jumadiluly on shaqty jyldan beri er jasaý kásibimen aınalysady. Qytaılyq BAQ-tyń dereginshe, er jasaý óneri Nurektiń ákesinen úırengen óneri eken.

Ol kúnine bir er jasaı alady, tabysy da aıtarlyqtaı jaqsy. N. Jumadiluly bir erdi 1300 ıýanǵa (88 400 teńge kóleminde) satady.

«Keıde bir aıda 20 erge tapsyrys qabyldaıdy. Onyń erleri asa ótimdi, jasap bolysymen kópshilik kezekte turyp, alyp ketedi. Bul ata kásibi oǵan tabys kózin ǵana emes, baqyt pen qýanysh ta ala keldi», dep jazady «Halyq Gazeti».

Mońǵolııalyq eki qandasymyzǵa memlekettik ataq berildi - Kaznews

Ǵun ımperııasyna 2230 jyl, Uly Mońǵol memleketine 815 jyl, Ult azattyq qozǵalysyna 110 jyl, Mońǵol Halyq revolıýtsııasynyń tóńkerisine 100 jyl tolýyna oraı Mońǵolııa Prezıdenti Ý.Húrelsúh jarlyq shyǵaryp birqatar azamattarǵa memlekettik joǵarǵy ataq, orden, medal tabystady, dep habarlaıdy « Kaznews «.

Atalǵan BAQ-tyń dereginshe, Mońǵolııa Prezıdenti Ý.Húrelsúhtiń jarlyǵy boıynsha Mońǵolııanyń Ulttyq onkologııalyq ortalyǵynyń keńesshi dárigeri, Eńbek sińirgen dáriger, doktor, professor Asaı Rámishulyna «Halyq dárigeri» ataǵy berildi.

Sondaı-aq, Anýaruly Notaǵa Mońǵolııanyń «Eńbek eri» ataǵy berildi.

Mońǵolııa Prezıdentiniń jarlyǵy boıynsha neırohırýrgııa salasynda mı qan tamyrlary aýrýlarynyń dıagnostıkasyn, hırýrgııasyn jáne emdeýin teorııalyq turǵyda damytyp, ony tájirıbege tolyǵymen engizýmen qatar nátıjelerin álemdik deńgeıge jetkizgeni úshin Memlekettik syılyqtyń ıegeri, Eńbek sińirgen dáriger, doktor, professor, dańqty neırohırýrg Anýaruly Notaǵa Mońǵolııanyń «Eńbek eri» ataǵy berildi.

Úshqudyqtan 3 qandasymyz halyqaralyq baıqaýda jeńiske jetti - «Úshqudyq» gazeti

Táýelsiz Memleketter Dostastyǵy elderiniń 30 jyldyǵyna oraı Halyqaralyq jas ǵalymdar qaýymdastyǵy men «Bóbek» ultaralyq qozǵalysynyń uıymdastyrýmen «Bilim salasyndaǵy úzdikter-2021», III Halyqaralyq kitap basylymy, TMD jas ǵalymdarynyń ǵylymy men jeke jetistikterin tanymal etýge baǵyttalǵan biregeı joba qorytyndylandy, dep jazady ózbekstandyq «Úshqudyq» gazeti.

Bul jobaǵa halyqaralyq yntymaqtastyq jáne ǵylymdy odan ári ıntegratsııalaý aıasynda Belarýs, Reseı, Qazaqstan, Ózbekstan, Tájikstan, Qyrǵyzstan elderinen ár túrli saladaǵy jas ǵalymdar men talapty jastar qatysty.

Atalǵan baıqaýǵa Ózbekstan respýblıkasy, Naýaıy oblysy Úshqudyq aýdany №9 mektebiniń qazaq tili jáne ádebıeti páni oqytýshysy Baljan Rzahmetova men №2 mekteptiń ınformatıka páni oqytýshysy Sarvar Qosımov óz jumystaryn usyndy.

Baljan Rzahmetova I dárejeli dıplom, «Úzdik pedagog - 2021» ataǵymen jáne Sarvar Qosımov II dárejeli dıplom, «Úzdik pedagog - 2021» nagradalyq tósbelgisimen marapattaldy. Sonymen qatar №9 mektep dırektory Roza Júsipbekova men №2 mektep dırektory Mergen Tóreshovke «Alǵys hat» berildi.

Sonymen qatar, jýyrda Qazaqstan Respýblıkasy Táýelsizdiginiń 30 jyldyǵyna, akademık, tarıhshy, ǵalym Manash Qozybaevtyń týǵanyna 90 jyl mereıtoıyna oraı «M.Qozybaev atyndaǵy Soltústik Qazaqstan Ýnıversıteti KeAQ «Foundation» fakýlteti «Táýelsizdik – amanaty babamnyń» atty halyqaralyq poezııa oqý beıne saıysyn ótkizdi.

Saıysta Qytaı, Iran, Qazaqstan, Ózbekstan, Mońǵolııa elderinen 40-tan asa qatysýshy baqtaryn synaǵan. Іs-sharanyń qorytyndysy boıynsha Úshqudyq aýdanynyń maqtanyshy, №9 Jalpy orta mektebiniń 11 synyp oqýshysy Ferýzabaný Ibodova I oryndy ıelegen. Ferýzaǵa Manash Qozybaev entsıklopedııasy men birge qarjylaı syılyq tabystaldy, dep habarlaıdy ózbekstandyq basylym.

Qytaıdyń alǵashqy koronavırýsqa qarsy arnaıy dárisi maquldanyp, naryqqa shyqty - «Halyq Gazeti»

Dári úlgileri Ambavırýmab jáne Romıspırýmab suıyqtyǵy dep atalady.

Beıjińdegi Tsınhýa ýnıversıtetinde ótken baspasóz májilisinde Tsınhýa ýnıversıtetiniń professory Chjan Lıntsı jetekshilik etip zerttep, ázirlegen Qytaıdaǵy koronavırýsqa qarsy alǵashqy dári maquldaýǵa ıe bolyp, naryqqa shyqqanyn jarııalady, dep habarlaıdy «Halyq Gazeti».

«Bul Qytaıdyń ózinde alǵashqy ret ózi zerttep, daıyndaǵan ári qatań, qupııa (double blind) jáne platsebo-baqylaý synaǵynan ótken, koronavırýsqa qarsy qoldanýǵa bolatyn arnaıy dárisi bar bolǵanyn bildiredi», dep jazady qytaılyq BAQ.


Avtor:
Tilshi

Jańalyqtar

MURAǴAT