Mobıldik aqsha aýdarymdaryn baqylaý: Memlekettik kirister komıtetiniń túsinigi
2021 jylǵy 27 qarasha 19:37

Mobıldik aqsha aýdarymdaryn baqylaý: Memlekettik kirister komıtetiniń túsinigi

NUR-SULTAN. QazAqparat – QR Qarjy mınıstrligi Memlekettik kirister komıteti jeke kásipkerlerdiń, sonyń ishinde taksı qyzmetimen aınalysatyn azamattardyń mobıldik aqsha aýdarymdaryn baqylaýǵa qatysty túsinik berdi, dep habarlaıdy QazAqparat.

«Qazirgi ýaqytta jelide kásipkerlikpen, onyń ishinde jeke tasymaldaýmen aınalysatyn adamdardyń mobıldik aýdarymdaryn jappaı baqylaý týraly aqparat taratylýda.

Bıznes sýbektilerine salyq salý barynsha ońaılatylǵanyn aıta ketý kerek, taksı júrgizýshileri patent negizinde arnaıy salyq rejımin qoldana alady. Ol boıynsha mólsherleme jalpy kiristiń tek 1% quraıdy. Mysaly, eger kiris 300 myń teńgeni qurasa, onda salyq aıyna bar bolǵany 3 myń teńge bolady.

Bul rette, kassalyq apparatty satyp alý mindetti emes. Onlaın kassalyq apparattardyń birneshe tegin mobıldik nusqalary bar», - delingen komıtet habarlamasynda.

Málim etilgendeı, kelesi jyldan bastap «e-Salyk Business»mobıldik qosymshasyn paıdalana otyryp júrgiziletin arnaýly salyq rejımi engiziledi.

«Osy qosymshada dara kásipkerge tirkelýge, salyq salý rejımin tańdaýǵa bolady, qosymsha kassalyq apparat retinde paıdalanylýy múmkin. Salyqtar men tólemderdi osy qosymshany qoldana otyryp tóleýge bolady», - dep naqtylady vedomstvodan.

Aıta keteıik, memleket shaǵyn kásipkerlikti damytý maqsatynda dara kásipkerlerdi 2023 jylǵa deıin kirisinen salyq tóleýden bosatyp, tekserý júrgizýge moratorıı jarııalady.

«Osyǵan baılanysty kásipkerlerdi zańdy bıznes júrgizýge, naqty kiristerdi kórsetýge shaqyramyz. Bul jalpyǵa birdeı deklaratsııalaýdy engizý qarsańynda ásirese ózekti», - dedi Memlekettik kirister komıtetinen.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT