Mınıstrlik zeınetaqy jınaǵyn depozıtke aýdarý múmkindigin túsindirdi
2021 jylǵy 6 jeltoqsan 21:00

Mınıstrlik zeınetaqy jınaǵyn depozıtke aýdarý múmkindigin túsindirdi

NUR-SULTAN. QazAqparat – Biryńǵaı jınaqtyq zeınetaqy qoryndaǵy eń tómen jetkilikti shekten artylǵan qarjyny «Otbasy banktegi» depozıtke aýdarý múmkindigi týraly taraǵan aqparattyń «arnaıy shotqa» qatysy joq. Bul týraly QR Indýstrııa jáne ınfraqurylymdyq damý mınıstrliginiń baspasóz qyzmeti aıtty, dep habarlaıdy QazAqparat tilshisi.

BJZQ-daǵy eń tómen jetkilikti shekten artylǵan aqshany «Otbasy bank» depozıtine aýdarý tek 2022 jyldan bastap múmkin bolatyny týraly habar taraǵan bolatyn.

«Mınıstrlik Memleket basshysynyń 2021 jylǵy 1 qyrkúıektegi «Halyq birligi jáne júıeli reformalar – el órkendeýiniń berik negizi» atty Qazaqstan halqyna Joldaýyn eskere otyryp, turǵyn úı jaǵdaıyn jaqsartý úshin birjolǵy zeınetaqy tólemderin paıdalaný qaǵıdalaryna ózgerister engizýdi kózdeıtin buıryq jobasyn ázirlep, 24 qyrkúıekte múddeli memlekettik organdarǵa kelisýge jibergen bolatyn. Biryńǵaı ustanymdy ázirlegennen jáne Eńbekmıni, QR UB, Qarjy naryǵyn retteý jáne damytý agenttigi maquldaý bergen soń qaǵıdalar zańdy kúshine enedi», - delingen resmı málimette.

QR Indýstrııa jáne ınfraqurylymdyq damý mınıstrliginiń baspasóz qyzmetiniń mamandary «Otbasy bank» depozıtin birjolǵy zeınetaqy tólemin emdelý men turǵyn úı máselesin sheshý úshin ashqan arnaıy shotpen shatastyrýǵa bolmaıtynyn aıtady. Aıtýlarynsha, bul birjolǵy zeınetaqy tólemderin baspana máselesine jumsaýdyń jolyn jeńildete túsetin qadam bolmaq.

«Qazaqstandyqtar «Otbasy bank» arqyly ıpoteka rásimdeý úshin depozıt ashyp, soǵan salym salý arqyly, bastapqy jarnaǵa qajet somany jınaqtap keldi. Endi sol depozıtke BJZQ-daǵy eń tómen jetkilikti shekten artylǵan somany birden aýdarýǵa bolatyndaı jaǵdaı jasamaqshymyz. Búgingi jańalyqtyń máni osynda. Al «Otbasy banktegi» birjolǵy zeınetaqy tólemin emdelý men turǵyn úı máselesin sheshý úshin paıdalanýǵa arnap ashylǵan «arnaıy shotqa» eshkim shekteý qoıyp otyrǵan joq. Burynǵysynsha emdeýge de, turǵyn úı máselesin sheshýge de aqsha aýdaryla beredi», - dep túsindirdi mınıstrliktiń baspasóz qyzmetiniń mamandary.

Eske salaıyq, 2022 jyly birjolǵy zeınetaqy tólemin alýdyń jetkiliktilik shegi 1,8 ese kóteriledi. QR Eńbek jáne halyqty áleýmettik qorǵaý mınıstrliginiń baspasóz hatshysy Aleksandr Kononets atalǵan shekti mólsher nelikten arttyrylatynyn túsindirdi.
Uqsas jańalyqtar
Seriktester jańalyqtary

Jańalyqtar

Úrdis

MURAǴAT