Jańalyqtar  >
  Qoǵam
Mınıstrlik avtobýs júrgizýshisi kýáligin alýǵa talaptardy jeńildetýdi usyndy
2022 jylǵy 10 tamyz 21:10

Mınıstrlik avtobýs júrgizýshisi kýáligin alýǵa talaptardy jeńildetýdi usyndy

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi Kólik komıteti tóraǵanyń orynbasary Altaı Sembekuly «D» sanatyndaǵy júrgizýshi kýáligin alý úshin talaptardy jeńildetý usynysyn aıtty, dep habarlaıdy QazAqparat tilshisi.

«Qaladaǵy avtobýs júrgizýshileriniń tapshylyǵyna toqtalsaq, buǵan «D» sanatyndaǵy júrgizýshi káýligin alýǵa joǵary talaptardyń bolýy da yqpal etip tur. Osy talaptardy jeńildetý úshin «Jol júrisi týraly» jáne «Avtomobıl kóligi týraly» zańdaryna tolyqtyrýlar engizý kerek. Sondyqtan bul másele Úkimet basshylyǵy deńgeıinde birneshe ret qaraldy», - dedi A. Sembekuly mınıstrlikte ótken keńeste.

Onyń aıtýynsha, Parlament Májilisi depýtattary «D» sanatyndaǵy kýálikti alý turǵysynda tıisti zańnamalyq túzetýlerge bastamashylyq jasaǵan.

«Alaıda joldaǵy qozǵalys qaýipsizdigi máselesine jetekshilik etetin organ retinde Іshki ister mınıstrligi bul usynystardy qoldamaı otyr. Osy oraıda bul máseleni talqylaý úshin Іshki ister mınıstrligi ókilderiniń qatysýymen keńes ótkizý kerek», - dedi komıtet ókili.

Onyń sózine qaraǵanda, qazirgi kezde «D» sanatyndaǵy júrgizýshi kýáligi elimizde 387 713 adamda bar. Al «D» sanatyndaǵy kólikterdiń jalpy sany 63 501-di qurap otyr. Bul turǵyda qalalardaǵy baǵdarlarǵa 10 525 avtobýs jumyldyrylǵan.

Budan buryn habarlanǵandaı, Altaı Sembekuly qalalarda jolaýshylar tasymaly salasynda áleýmettik mańyzdaǵy baǵdarlardy sýbsıdııalaý problemalaryn aıtty .

Sońǵy 4 jylda sýbsıdııalaý somasy bes ese ósip, 102 mlrd teńgeni qurady. Degenmen bul qarajattyń 80 paıyzǵa jýyǵy tek Nur-Sultan, Almaty, Shymkent qalalaryna ǵana tıesili boldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT