Mınıstrlerdiń halyqpen kezdesýiniń bıylǵa arnalǵan kestesi bekitildi
2022 jylǵy 26 mamyr 10:25

Mınıstrlerdiń halyqpen kezdesýiniń bıylǵa arnalǵan kestesi bekitildi

NUR-SULTAN. QazAqparat - QR Premer-Mınıstri Álıhan Smaıylov ortalyq atqarýshy organdar basshylarynyń halyqpen kezdesýiniń 2022 jylǵa arnalǵan kestesi bekitilgen QR Úkimetiniń qaýlysyna qol qoıdy, dep habarlaıdy QazAqparat.

Úkimet baspasóz qyzmetiniń málimetinshe, Memleket basshysy Qasym-Jomart Toqaev Úkimet múshelerine óńirlerge baryp esep berýdi, qazaqstandyqtardy elimizde júrgizilip jatqan reformalar týraly habardar etýdi, atqarýshy organdardyń el turǵyndary aldynda esep berýi men jaýapkershiligin kúsheıtýdi, halyqty memlekettik basqarý protsesine keńinen tartýdy tapsyrǵan.

Atalǵan kezdesýler kezinde mınıstrler óz salasy boıynsha azamattardy jeke qabyldaıdy.

Birinshi kezekte jergilikti deńgeıde sheshimin tappaǵan jáne vedomstvoaralyq tásilderdi qoldanýdy talap etetin problemalyq máseleler qaralady.

Negizgi jańalyq – kezdesýdiń keminde 75%-y «suraq-jaýap» formatynda ótedi.

Mınıstrler kezdesýlerdiń qorytyndysy men halyqtyń problemalyq máseleleri boıynsha qabyldanǵan sheshimder týraly Úkimette esep berýi tıis.

Ortalyq memlekettik organdar basshylarynyń kezdesý kestesimen tolyǵyraq myna siltemede tanysýǵa bolady.


Jańalyqtar

MURAǴAT