Mınıstr múlik ıeleri birlestigine kóshýdiń mehanızmin túsindirdi
2022 jylǵy 2 shilde 12:40

Mınıstr múlik ıeleri birlestigine kóshýdiń mehanızmin túsindirdi

NUR-SULTAN. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev Múlik ıeleri birlestigine kóshýdiń mehanızmin túsindirdi, dep habarlaıdy QazAqparat tilshisi.

«Turǵyn úı-kommýnaldyq sharýashylyq ortalyǵy jergilikti atqarýshy organdar usynǵan derekter negizinde MIB-ti jáne JS basqarýdyń jańa nysandaryna kóshý boıynsha statıstıkalyq derekterdi júrgizedi. Árbir óńirde jergilikti atqarýshy organdarda MIB jáne JS basqarýdyń jańa nysandaryna kóshý jónindegi jol kartasy bekitildi. Basqarýdyń jańa nysandaryna júıeli kóshý boıynsha jumys jalǵasýda», - dep jazdy Qaıyrbek Óskenbaev depýtattyq saýalǵa bergen jaýabynda.

Mınıstr bıylǵy 22 maýsymda QR Parlamenti Májilisiniń plenarlyq otyrysynda «Qazaqstan Respýblıkasynyń keıbir zańnamalyq aktilerine elektr energetıkasy, energııa únemdeý jáne energııa tıimdiligin arttyrý, jer qoınaýyn paıdalaný, jergilikti memlekettik basqarý, memlekettik shekara, turǵyn úıkommýnaldyq sharýashylyq jáne ǵylym máseleleri boıynsha ózgerister men tolyqtyrýlar engizý týraly» zań maquldanǵanyn eske saldy.

Osy zań sheńberinde kondomınıým obektisin basqarýdyń jańa nysandaryna kóshý merzimin uzartý jónindegi norma zańǵa engizildi.

«Zańnyń negizgi ıdeıalarynyń biri – turǵyndarǵa óz úılerin ózdigimen nemese jasalǵan kelisim negizinde basqarýshy kompanııalardy nemese kóppáterli turǵyn úı menedjerin tartý arqyly basqarý quqyǵyn berý. Bul rette kondomınıým obektisin basqarý nysanyn tańdaý týraly sheshim qabyldaý páter, turǵyn emes úı-jaılardyń menshik ıeleri jınalysynyń aıryqsha quzyretine jatqyzylatynyn atap ótemiz», - deıdi mınıstr.

Ol úshin páterlerdiń, turǵyn emes úı-jaılardyń menshik ıeleri jaı seriktestik nemese kommertsııalyq emes uıym-múlik ıeleriniń birlestigin (MIB) qurýy tıis.

«Kondomınıým obektisin basqarýdyń eki formasy da «bir úı – bir birlestik nemese jaı seriktestik – bir shot» qaǵıdaty boıynsha jumys isteıdi, bul múlik ıeleriniń árbir birlestigi, jaı seriktestik óziniń aǵymdaǵy jáne jınaq shottaryn ashatynyn bildiredi. Bul kóppáterli basqarý jáne ustaý protsesteriniń qarjylyq ashyqtyǵy men ashyqtyǵyn qamtamasyz etýge múmkindik beredi», - dedi Q. Óskenbaev.

Buǵan deıin Parlament MIB-ke aýysý merzimin 2023 jyldyń 1 shildesine deıin uzartqan edi.



Jańalyqtar

Úrdis

MURAǴAT