Mınıstr Almaty oblysynda qaza tapqan polıtseılerdiń otbasylaryna memlekettik nagradalar tapsyrdy
TALDYQORǴAN. QazAqparat – Memleket Basshysy Qasym-Jomart Toqaevtyń Jarlyǵymen jappaı tártipsizdik kezinde qyzmettik mindetterin atqarý ústinde qaza tapqan polıtsııa qyzmetkerleri Darhan Barǵanaev pen Erbol Erjanov «Aıbyn» ordenimen marapattaldy. Іshki ister mınıstri Erlan Turǵymbaev olardyń otbasylaryna memlekettik nagradalardy tabystady, dep habarlaıdy QazAqparat Polisia.kz saıtyna silteme jasap.
«Bizdiń áriptesterimiz, polıtsııa leıtenanty Darhan Barǵanaev jáne ádilet praporıgi Erbol Erjanov ómiriniń sońǵy sátine deıin Otanǵa, halyqqa degen adaldyǵyn abyroımen kórsetti. Olar biz úshin árqashan Otanǵa adal qyzmet etýdiń, erliktiń jáne paryzǵa beriktiktiń úlgisi bolady», – dep atap ótti Erlan Turǵymbaev.
Polıtseılerdiń kúndelikti jumysy ómir men densaýlyqqa qaýip tóndiredi. Qıyn jaǵdaılarda qyzmetkerler birneshe sekýnd ishinde jaýapty sheshimder qabyldaýǵa májbúr. Olardyń keıbiri adam ómirimen baılanysty bolyp jatady.
Áskerı jáne qyzmettik boryshyn oryndaý kezinde kórsetken erligi men janqııarlyǵy, sondaı-aq memleket múddesin qorǵaý kezinde jasaǵan erlikteri úshin Almaty oblysy boıynsha Qylmystyq-atqarý júıesi departamentiniń LA-155/16 mekemesiniń qyzmetkeri Erbol Erjanov III dárejeli «Aıbyn» ordenimen, Almaty oblysy Polıtsııa departamenti Jedel qımyldaý arnaıy jasaǵynyń qyzmetkeri Darhan Barǵanaev II dárejeli «Aıbyn» ordenimen marapattaldy.
Erbol Erjanov ishki ister organdarynda 1999 jyldan bastap qyzmet atqardy. Ol jas qyzmetkerlerge tálimger boldy jáne eki balany tárbıelep otyrǵan kásibı, adal qyzmetker retinde kópke úlgi edi. Darhan Barǵanaev ІІO júıesinde qyzmetin 2011 jyly bastady. Qyzmet etken jyldary ol óziniń kásibıligin arttyryp, qaýipsizdikti jaqsartýǵa umtyldy.
