Messı men Mbappe fýtboldan álem chempıonatynan keıin qalaı kezdesti
ASTANA. QazAqparat – «PSJ» (Parıj) komandasynyń shabýylshylary Lıonel Messı men Kılıan Mbappe Qatarda ótken álem chempıonatynan keıin alǵash ret kezdesti, dep habarlaıdy QazAqparat tilshisi.
Shampionat.com saıtynan alynǵan málimetke qaraǵanda, qysqa merzimdi demalys alǵan Mbappe «PSJ» klýbyna qaıta oraldy. Jýyrda Messı de «PSJ» komandasy quramynda Frantsııa birinshiliginde «Anjemen» ótken matchta alańǵa shyǵyp, gol soqqan edi. Qos juldyzdyń bıylǵy birinshi kezdesýi oń shyraıda ótken, fýtbolshylar jyly kórisken.
Qatardaǵy álem birinshiliginen keıin Argentına quramasynyń qaqpashysy Emılıano Martınes frantsııalyq shabýylshyny ájýalaýǵa tyrysqan bolatyn. Buǵan Messı kedergi keltirmegen edi. Biraq osyǵan oraı Mbappe eshqandaı pikir bildirmedi. Onyń ornyna Messıdi álem chempıony atanýymen quttyqtady.
Eske sala keteıik, budan buryn Karım Benzemanyń Ispanııa sýperkýboginde Messıdiń rekordyn qaıtalaǵanyn jazǵan bolatynbyz.
Foto – Shampionat.com.
