«Meni Toqaevpen qosyńyz»: Tótenshe jaǵdaı kezinde jedel jelige qandaı suraqtar kelip tústi – psıhologpen suhbat
2022 jylǵy 16 aqpan 10:16

«Meni Toqaevpen qosyńyz»: Tótenshe jaǵdaı kezinde jedel jelige qandaı suraqtar kelip tústi – psıhologpen suhbat

NUR-SULTAN. QazAqparat – Astanalyq Zarına Kenjekar - kásibı psıholog. Maman qańtarda bolǵan eldegi jappaı tártipsizdikter jáne tótenshe jaǵdaı kezinde qoldaýǵa zárý jandarǵa psıhologııalyq kómek kórsetti. Osy oraıda QazAqparat tilshisi qańtar oqıǵasy kezinde qazaqstandyqtarǵa qandaı qoldaý qajet boldy jáne kómektiń qalaı kórsetilgeni týraly Zarına Kenjekarmen áńgimelesken edi.

«Ózim - 4 balanyń anasymyn. Úıde týǵan aǵam men jeńgem - áskerı qyzmetshiler. Jappaı tártipsizdikter kezinde elde qandaı jaǵdaı bolǵanyn bárimiz bilemiz. Bizdiń úıde de kútpegen jaǵdaı boldy. Sebebi aǵam men jeńgem qyzmet babymen 5 kún úıde bolmady. Úıde anam, men jáne bala-shaǵa ǵana qaldyq. Sol sátte áriptesim jedel psıhologııalyq qoldaý kórsetý ortalyǵy qurylyp jatyr dep maǵan jumys isteýdi usyndy. Oılana kele, tótenshe jaǵdaıda az da bolsa elge paıdam tısin dep, volonter retinde jumys isteýge kelistim», - dedi Zarına Kenjekar.

Onyń aıtýynsha, tótenshe jaǵdaı kezinde 2 tún boıy jedel jelige habarlasqan jandarǵa psıhologııalyq kómek kórsetken. Sol 2 túnniń ishinde biraz jannyń janaıqaıyn estip, qoldaý bildirgen.

«Túngi aýysymda jumys isteýge kelisken sebebim - kúndiz balalarymnyń tárbıesimen aınalystym. Tótenshe jaǵdaı kezinde 1414 jedel jelisine turǵyndar túrli suraqtarmen habarlasty. Negizinen onlaın formatta, ıaǵnı telefon arqyly psıhologııalyq qoldaý kórsettik. Biraq qajet jaǵdaıda júzdesip, máseleni betpe-bet qaraý múmkindigi de boldy. Qońyraý elimizdiń barlyq óńirinen kelip tústi. Degenmen kóbinese Almaty, Shymkent jáne Qyzylorda turǵyndary habarlasty. Kelip túsken suraqtar men máseleler ártúrli boldy. Shyny kerek, keı adamdar jedel jelige ne úshin habarlasqanyn da aıta almaı jatty. Elde kútpegen jaǵdaı bolǵandyqtan adamdardyń sasyp qalǵany da túsinikti. Qarapaıym halyqtyń kásibı túrde psıhologtyń kómegine júgine qoımaıtyny baıqaldy», - deıdi ol.

Mamannyń sózinshe, jedel jelige habarlasqan jandardyń deni muńyn tyńdaýdy ótingen. Olar úshin sol sátte jan dúnıesimen bólisý mańyzdy bolǵan.

«Habarlasqan jandar ishki dúnıesin aqtardy, árıne, men olardy tyńdadym. Sonymen qatar, jappaı tártipsizdikter kezinde jaqynyn joǵaltqandar jıi habarlasty. Mysaly, Almaty turǵyny «Qaskeleńde turatyn inim habar-osharsyz ketti, qaıda ekenin bilmeımin» dep kómek surady. Árıne, qazir aıtýǵa ońaı, biraq sol sátte aýyr tıdi. Sebebi, ol kisi týǵan baýyrynyń óli-tirisin bilmeı, amal joqtyǵynan bizge habarlasyp tur. Taǵy bir turǵyn Talǵardan qońyraý shaldy. Onyń aıtýynsha, ózi 3 balanyń ákesi eken, áıeli bala kútimimen úıde otyr. Ol jappaı tártipsizdikterdiń saldarynan jumyssyz qalǵan. Otbasyn asyraý kerek, ne isterin bilmeı bizge jumys taýyp berińizdershi dep kómek surady. Odan bólek, 2 balanyń anasy, jalǵyzbasty áıel habarlasty. Ol Almatynyń ortalyǵynda turady eken, úıinde azyq-túlik bitken, syrtqa shyǵý - qaýipti. Ózim úshin emes, balalarymdy ýaıymdadym deıdi», - dep eske aldy maman.

Sondaı-aq, psıholog ortalyqqa kelip túsken suraqtar men ótinishterdiń aıasy keń ekenin aıtty. Zarına Kenjekar túngi saǵat 22:00-den tańǵy saǵat 07:00 aralyǵynda jelide bolyp, habarlasqan jandarǵa psıhologııalyq qoldaý kórsetken.

«Meni Toqaevpen qosyńyz» dep habarlasqan azamat ta boldy. Keıin anyqtalǵandaı, ol egde jastaǵy kisi bolyp shyqty, Prezıdentke aıtatyn keńesim bar deıdi. Taǵy bir jaǵdaı, túnde qyz bala habarlasyp, «shylym tartqym kelip tur» deıdi. Temekisi bitip qalǵan, syrtqa shyǵaıyn dese -komendanttyq saǵat. Aıta bersem, oqıǵalar jetip jatyr. Jedel jelige bireý shynymen úlken problemasymen, ne isterin bilmeı habarlasyp jatsa, bireýlerde kerisinshe boldy», - deıdi maman.

Psıholog áńgime sońynda qandaı jaǵdaı bolmasyn maman retinde qoldaý kórsetý mindeti ekenin aıtty.

«Jalpy psıhologııada ár jaǵdaıǵa baılanysty qoldanatyn arnaıy ádis-tásil bar. Óz basym tótenshe jaǵdaı kezinde habarlasqan jandarmen geshtalt jáne transaktilik taldaý metodıkasy arqyly jumys istedim. Negizi meniń psıhologııadaǵy jumys baǵytym - erkek pen áıel, ata-ana men bala qarym-qatynasy, sondaı-aq 12 jastan asqan jasóspirimdermen jumys isteımin» - dedi Z. Kenjekar.


Uqsas jańalyqtar

Jańalyqtar

Úrdis

MURAǴAT