Memlekettiń qatysýymen mamandandyrylǵan salalyq bankter qurýǵa ruqsat joq
2022 jylǵy 23 mamyr 16:33

Memlekettiń qatysýymen mamandandyrylǵan salalyq bankter qurýǵa ruqsat joq

NUR-SULTAN. QazAqparat – Qazaqstanda memlekettiń qatysýymen mamandandyrylǵan salalyq bankter qurýǵa jol berilmeıdi. Bul týraly Májilis depýtattarynyń saýalyna QR Qarjy naryǵyn retteý jáne damytý agenttiginiń tóraǵasy Mádına Ábilqasovanyń jaýabynda aıtylǵan, dep habarlaıdy QazAqparat tilshisi.

«Bankter týraly zańnyń 3-babynyń 7-tarmaǵyna sáıkes «Qazaqstannyń turǵyn úı qurylys jınaq banki» AQ-ty qospaǵanda, Qazaqstan Respýblıkasynda memlekettiń qatysýymen mamandandyrylǵan salalyq bankter qurýǵa jol berilmeıdi. Qazaqstanda aýyldyq taýar óndirýshilerdiń, ónerkásip salasynyń qarjylyq qyzmetterge degen qajettilikterin qanaǵattandyrýǵa múmkindik beretin kóp deńgeıli banktik júıe qalyptasqan», - dep atap ótedi agenttik tóraǵasy jaýabynda.

Mádına Ábilqasovanyń atap ótýinshe, qyzmeti aýyl sharýashylyǵyn, ónerkásipti, qurylysty kredıtteýmen jáne kepildendirýmen baılanysty ámbebap kommertsııalyq bankterdiń, kredıttik seriktestikterdiń, túrli mamandandyrylǵan mekemelerdiń jetkilikti sany, onyń ishinde «Agrarlyq kredıttik korporatsııa» AQ men «Damý» kásipkerlikti damytý qory» AQ jumys isteıdi.

«Qurýǵa usynylatyn Agrobanktiń, Promstroıbanktiń shaǵyn salasy olarda ártaraptandyrylmaıtyn táýekelderdiń joǵary deńgeıde shoǵyrlanýyn boljaıdy. Sondaı-aq, mundaı bankterdiń halyqtyń depozıtin tartý jáne olardy qaıtarýda qıyndyqtarǵa tap bolý yqtımaldyǵy joǵary, bul nátıjesinde olardyń qarjylyq ornyqtylyǵyn qamtamasyz etý úshin qosymsha bıýdjet qarajatyn salýdy talap etedi», - dedi ol.


Uqsas jańalyqtar

Jańalyqtar

MURAǴAT