Memleket basshysyna koronavırýsqa qarsy otandyq vaktsınany ázirleý barysy týraly baıandaldy

NUR-SULTAN. QazAqparat - Memleket basshysy Qasym-Jomart ToqaevPremer-Mınıstr Asqar Mamındi qabyldady, dep habarlaıdy QazAqparat Aqordaǵa siltememen.

Qasym-Jomart Toqaevqa koronavırýs indetine qarsy otandyq vaktsınanyń ázirlený barysy týraly baıandaldy.

Premer-Mınıstr Prezıdentke 29 qarasha kúni klınıkalyq synaqtardyń 1 jáne 2-kezeńderiniń aıaqtalǵany týraly málimdedi. Asqar Mamınniń aıtýynsha, vaktsınanyń keri áseri anyqtalǵan joq jáne onyń joǵary tıimdiligi tirkeldi. 25 jeltoqsannan bastap klınıkalyq synaqtardyń 3-shi kezeńinde atalǵan vaktsına 3 myń eriktige egiledi. Synaqtar tolyǵymen 2021 jyly naýryzdyń sońyna qaraı aıaqtalady.

Sonymen qatar Memleket basshysyna osy jyldyń sońyna deıin 2 mıllıon mólsher kólemindegi otandyq vaktsınanyń alǵashqy partııasy shyǵarylatyny týraly aqparat berildi.

Memleket basshysynyń Reseı Prezıdenti Vladımır Pýtınmen jasaǵan kelisimine sáıkes osy jyldyń 22 jeltoqsanynan bastap Qazaqstanda reseılik «Spýtnık V» vaktsınasyn óndirý qolǵa alynady. 2021 jyldan bastap turǵyndarǵa erikti túrde jappaı vaktsına egý josparlanyp otyr. Alǵashqy kezeńde turǵyndardyń aýrýdy juqtyrý qaýpi joǵary toby, ıaǵnı dárigerler, pedagogtar, kúshtik qurylymdardyń qyzmetkerleri qamtylady.

Qasym-Jomart Toqaev Asqar Mamınge otandyq vaktsına óndirisine qatysty berilgen tapsyrmany jedel oryndaǵany úshin alǵys bildirip, dáriniń tıimdiligine basa mán berýdi jáne turǵyndarǵa qol jetimdi bolýyn baqylaýda ustaýdy tapsyrdy.