+7 (701) 759 90 19
USD 426.14 EUR 497.05
RUB 6.02 CNY 66.69
Jańalyqtar

Memleket basshysy UQShU Ujymdyq qaýipsizdik keńesiniń sessııasyna qatysty

2021 jylǵy 16 qyrkúıek 15:06
Bólisińiz:
Memleket basshysy UQShU Ujymdyq qaýipsizdik keńesiniń sessııasyna qatysty

DÝShANBE. QazAqparat - Memleket basshysy Qasym-Jomart Toqaev UQShU Ujymdyq qaýipsizdik keńesiniń sessııasyna qatysty, dep habarlaıdy Aqorda.

Dýshanbe qalasynda Ujymdyq qaýipsizdik týraly shart uıymy (UQShU) Ujymdyq qaýipsizdik keńesiniń sessııasy ótti.

Qazaqstan Prezıdenti Qasym-Jomart Toqaev, Belarýs Prezıdenti Aleksandr Lýkashenko, Qyrǵyzstan Prezıdenti Sadyr Japarov, Reseı Prezıdenti Vladımır Pýtın (beınebaılanys rejıminde), Tájikstan Prezıdenti Emomalı Rahmon, Armenııanyń Premer-Mınıstri Nıkol Pashınıan, sondaı-aq, UQShU-nyń Bas hatshysy Stanıslav Zas shaǵyn quramda kezdesý ótkizdi, sodan keıin kelissóz delegatsııalar músheleriniń qatysýymen jalǵasty.

Memleketter basshylary Aýǵanstandaǵy ahýalǵa, halyqaralyq jáne óńirlik qaýipsizdik máselelerine qatysty pikirlerin ortaǵa saldy. Sondaı-aq, 2021 jylǵy Uıym qyzmetiniń basym baǵyttarynyń júzege asyrylýyn qorytyndylap, aldaǵy kezeńge arnalǵan josparyn anyqtady.

Qasym-Jomart Toqaev shaǵyn formatta ótken kezdesý barysynda óz áriptesterine qatysýshy memleketter arasyndaǵy yqpaldastyqtyń ózekti máseleleri jónindegi Qazaqstannyń ustanymyn aıtty.

«Ujymdyq qaýipsizdik keńesiniń tamyz aıynda kezekten tys ótkizilgen sessııasynda Aýǵanstandaǵy túbegeıli ózgergen ahýalǵa baılanysty týyndaǵan syn-qaterler men qaýipti egjeı-tegjeıli talqyladyq. Qazaqstan taraptardyń osy kezdesýde aıtqan tásilderi men usynystaryn qoldaıdy. Olardy iske asyrý úshin naqty jumys isteýge daıynbyz. Birikken shtab janynan Jedel monıtorıng tobyn qurý jónindegi tájik tarapynyń bastamasyn der kezinde usynyldy dep sanaımyz. Bul Aýǵanstandaǵy jaǵdaıdy qadaǵalap otyrý maqsatynda UQShU-ǵa múshe memleketterdiń quzyretti organdarynyń is-qımyldaryn uıymdastyrý úshin qajet. Elderimizdegi terrorlyq oshaqtardy anyqtap, aýyzdyqtaý jónindegi, sondaı-aq, ekstremızm men terrorızm úgitine qarsy kúres jumystaryn kúsheıtý qajettigi týraly áriptesterimizdiń pikirlerin qoldaımyz. Ońtústik shekara ári UQShU-nyń ózindik «qaýipsizdik beldeýi» sanalatyn tájik shekarasyn bekemdeýge jan-jaqty kómek kórsetý qajet dep sanaımyz», – dedi Qazaqstan Prezıdenti.

Memleket basshysy Aýǵan bosqyndaryn jáne elderimizdiń aýmaǵynda sheteldiń áskerı bazasyn ornalastyrýdyń tıimsizdigi týraly ortaq ustanymdy qoldady. Sonymen qatar gýmanıtarlyq kómek pen aýǵan halqyna halyqaralyq qoldaý kórsetýdiń mańyzdylyǵy eskerilip, BUU-nyń Aýǵanstandaǵy Mıssııasynyń qyzmetkerleri Almaty qalasynda ýaqytsha ornalastyrylǵanyn aıtty.

Qazaqstan Prezıdenti Aýǵanstandaǵy ahýaldyń ýshyǵýyna alańdaıtynyn bildirdi. Onyń pikirinshe, osy eldegi áleýmettik-ekonomıkalyq jaǵdaı gýmanıtarlyq daǵdarysqa qaraı bet alǵan.

«Aýǵanstanmen aradaǵy qalyptasqan saýda-ekonomıkalyq, kólik-logıstıkalyq jáne energetıkalyq baılanystardy múmkindiginshe qaıta qalpyna keltirý mańyzdy dep sanaımyn. Aýǵanstandaǵy uzaqmerzimdi strategııalyq ustanymdaryn ázirleýge qatysty jańa bıliktiń qyzmetin muqııat baqylaýdy jalǵastyrý qajet dep oılaımyn. Bizdiń negizgi baǵdarymyz – BUU Qaýipsizdik Keńesiniń sheshimi. Qazaqstan ony tolyq qoldaýǵa nıetti», – dedi Qasym-Jomart Toqaev.

Prezıdenttiń aıtýynsha, Qazaqstan BUU aıasynda Qaýipsizdik Keńesiniń turaqty múshesi Reseımen jáne UQShU-ǵa múshe basqa da áriptesterimen ózara is-qımyl jasaýǵa nıetti.

«Aýǵanstannyń jańa bıligimen is-qımyldardy úılestirý jáne yqpaldastyqty qamtamasyz etý jóninde naqty sharalar qabyldaýdy usynamyn. Jańa aýǵan bıliginiń shekaralas memleketter men aımaqtarǵa terrorızm qaýpiniń taralmaýyna jol bermeý jónindegi mindettemelerin oryndaýy – bizdiń aıqyn basymdyǵymyz. Bul esirtki tasymaly men zańsyz kóshýge qatysty. Olarmen kúres barlyq múddeli taraptardyń ujymdyq kúsh-jigerin talap etedi», – dedi Memleket basshysy.

Sonymen qatar álemdik geosaıasatta oń ózgerister bar ekenin atap ótti.

«Olardyń ishindegi negizgisi – Reseı men AQSh prezıdentteriniń Jenevada ótken kezdesýi. Onyń qorytyndysy boıynsha eki iri ıadrolyq derjava arasyndaǵy strategııalyq teńgerimdi saqtaý máseleleri jóninde mańyzdy ýaǵdalastyqqa qol jetkizildi. UQShU aıasynda biz Reseı men AQSh arasyndaǵy strategııalyq shabýyl qarýlary týraly shartty uzartýdy saıası turǵydan qoldaıtynymyzdy bildirdik», – dedi Prezıdent.

Otyrys barysynda Qazaqstan halyqaralyq úsh kelisimniń qabyldanýyn quptady. Atap aıtqanda, ıýrısdıktsııa jáne quqyqtyq kómek kórsetý máseleleri, UQShU áskerlerin materıaldyq-tehnıkalyq qoldaý jáne medıtsınalyq turǵydan qamtamasyz etý týraly, sondaı-aq Bitimgerlik qyzmet týraly kelisim Hattamasy.

«Bul qujattardyń máni zor, olar jan-jaqty pysyqtalyp, onda taraptardyń ustanymdary eskerildi. Atalǵa qujattarǵa qol qoıylýyn quptaımyz. Jeltoqsan sessııasynda aıtylǵan usynysymdy iske asyrýda Bas hatshynyń bitimgerlik jónindegi arnaýly ókili týraly sheshimdi qabyldaımyz. Qoldaǵandary úshin barsha áriptesterime alǵysymdy bildiremin. Osyndaı ınstıtýttyń qurylýy Uıymnyń jumysyna tyń serpin beretinine senimdimin», – dedi Memleket basshysy.

Memleket basshysy BUU aıasynda Bıologııalyq qaýipsizdik jónindegi halyqaralyq agenttik qurý týraly usynysyn qoldaǵany úshin Reseı tarapyna rızashylyǵyn bildirdi. Qasym-Jomart Toqaev barsha áriptesterin bul bastamany BUU-da ilgeriletý isinde Qazaqstandy qoldaýǵa shaqyrdy.

Qazaqstan Prezıdenti sóziniń sońynda UQShU-ǵa tabysty tóraǵalyq etkeni úshin Emomalı Rahmonǵa alǵys aıtyp, Uıymǵa tóraǵalyq etý kezegi kelgen armıan áriptesterimen belsendi yntymaqtastyq ornatýǵa ázir ekenin jetkizdi.

Sammıt qorytyndysy boıynsha UQShU-ǵa múshe memleketterdiń basshylary Ujymdyq qaýipsizdik keńesiniń deklaratsııasyn qabyldady. Qazaqstan Prezıdentiniń aıtýynsha, bul jumysymyzdyń mańyzdy baǵdary jáne álemdik qoǵamdastyqqa berilgen aıqyn belgi.

Sonymen qatar tómendegi qujattarǵa qol qoıyldy jáne qabyldandy:

  • Ujymdyq qaýipsizdik týraly shart uıymyna múshe memleketterdiń aýmaqtarynda ujymdyq qaýipsizdik kúshteri men quraldary quramalarynyń ýaqytsha ornalasýyna qatysty ister boıynsha ıýrısdıktsııa jáne quqyqtyq kómek kórsetý máseleleri jónindegi kelisim.
  • Ujymdyq qaýipsizdik týraly shart uıymynyń Áskerlerin (Ujymdyq kúshterin) birlesip materıaldyq-tehnıkalyq jáne medıtsınalyq turǵydan qamtamasyz etý jónindegi kelisim.
  • Ujymdyq qaýipsizdik týraly shart uıymynyń Bitimgerlik qyzmeti týraly 2007 jylǵy 6 qazandaǵy kelisimge ózgerister engizý týraly hattama.
  • Ujymdyq qaýipsizdik týraly shart uıymy Ujymdyq qaýipsizdik keńesiniń «Ujymdyq qaýipsizdik týraly shartqa qol qoıýdyń 30 jyldyǵyna jáne Ujymdyq qaýipsizdik týraly shart uıymynyń 20 jyldyǵyna arnalǵan is-sharalar jospary týraly» sheshimi.
  • Ujymdyq qaýipsizdik týraly shart uıymy Ujymdyq qaýipsizdik keńesiniń «Ujymdyq qaýipsizdik týraly shart uıymy baılanysynyń qorǵalǵan mýltıservıstik júıesiniń shemasy týraly» sheshimi.
  • Ujymdyq qaýipsizdik týraly shart uıymy Ujymdyq qaýipsizdik keńesiniń «Ujymdyq qaýipsizdik týraly shart uıymy Bas hatshysynyń bitimgerlik máseleleri jónindegi arnaýly ókili týraly» sheshimi.
  • Ujymdyq qaýipsizdik týraly shart uıymy Ujymdyq qaýipsizdik keńesiniń «Ujymdyq qaýipsizdik týraly shart uıymynyń Áskerı-ekonomıkalyq yntymaqtastyq jónindegi memleketaralyq komıssııasynyń tóraǵasy týraly» sheshimi.
  • Ujymdyq qaýipsizdik týraly shart uıymy Ujymdyq qaýipsizdik keńesiniń «Ujymdyq qaýipsizdik týraly shart uıymynyń Birlesken shtabynyń bastyǵy týraly» sheshimi.
  • Ujymdyq qaýipsizdik týraly shart uıymy Ujymdyq qaýipsizdik keńesiniń «Ujymdyq qaýipsizdik týraly shart uıymynyń 2020 jylǵa arnalǵan bıýdjettiń atqarylýy jónindegi esebi týraly» sheshimi.
  • Ujymdyq qaýipsizdik týraly shart uıymy Ujymdyq qaýipsizdik keńesiniń «Ujymdyq qaýipsizdik týraly shart uıymynyń 2022 jylǵa arnalǵan bıýdjeti týraly» sheshimi.
  • Ujymdyq qaýipsizdik týraly shart uıymy Ujymdyq qaýipsizdik keńesiniń «Ujymdyq qaýipsizdik týraly shart uıymynyń Ujymdyq qaýipsizdik keńesiniń kezekti sessııasyn ótkizý ýaqyty men orny, Uıymǵa tóraǵalyq etý týraly» hattamalyq sheshimi.





Bizdiń kanalymyzǵa jazylyńyz:

Bólisińiz:
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Janıbek Amangeldı
Janıbek Amangeldı
954-059
REDAKTOR
Janat Qapalbaeva
Janat Qapalbaeva
954-059

MURAǴAT