+7 (701) 759 90 19
USD 425.59 EUR 505.43
RUB 5.61 CNY 64.83
Jańalyqtar

Memleket basshysy «Shevron» kompanııasy dırektorlar keńesiniń tóraǵasyn qabyldady

2020 jylǵy 21 qazan 14:36
Bólisińiz:
Memleket basshysy  «Shevron» kompanııasy dırektorlar keńesiniń tóraǵasyn qabyldady

NUR-SULTAN. QazAqparat - Qazaqstan Prezıdenti Qasym-Jomart Toqaev «Shevron» kompanııasy dırektorlar keńesiniń tóraǵasy jáne bas atqarýshy dırektory Maıkl Ýırtti qabyldady, dep habarlaıdy Aqorda.

Qasym-Jomart Toqaev beınebaılanys formatynda «Shevron» kompanııasy dırektorlar keńesiniń tóraǵasy jáne bas atqarýshy dırektory Maıkl Ýırtpen kezdesý ótkizdi.

Kezdesý barysynda «Shevron» kompanııasynyń Qazaqstanmen aradaǵy ózara is-qımyldardyń perspektıvasy, áli jalǵasyp jatqan COVID-19 pandemııasy jaǵdaıynda kómirsýtegi sektoryndaǵy birqatar jobany iske asyrý máseleleri, sondaı-aq, álemdik energetıka naryǵynyń ahýaly talqylandy.

Memleket basshysy «Shevron» kompanııasymen yntymaqtastyqty jáne onyń Qazaqstan ekonomıkasyn damytýǵa qosqan úlesin joǵary baǵalady.

«Shevron» kompanııasy Teńiz jáne Qarashyǵanaq munaı-gaz sektoryndaǵy iri jobalardy iske asyrýda senimdi seriktes retinde elimizdiń energetıka naryǵynda óte belsendi qyzmet atqarýda. Ókinishke qaraı, koronavırýs pandemııasy munaı jáne gaz ındýstrııasyna keri áseri etip, munaıǵa degen suranys pen usynys arasyndaǵy tepe teńdikti buzdy jáne onyń baǵasyn tómendetti», - dedi Qasym-Jomart Toqaev.

Prezıdent 2022 jylǵa qaraı Teńiz ken ornyndaǵy óndiris qýatyn keńeıtý jónindegi jobalardy ýaqytyly iske qosý Qazaqstan úshin mańyzdy ekenin aıtty. Memleket basshysy kompanııanyń jobany iske asyrý qyzmetin quptap, birqatar mindetterdiń merziminen buryn oryndalyp jatqanyn atap ótti.

Sonymen qatar koronavırýs pandemııasyna qarsy is-qımyl máseleleri talqylandy. Memleket basshysy koronavırýs ınfektsııasyn jappaı juqtyrýdyń aldyn alý boıynsha joǵary deńgeıde úılestirilgen jumysy jáne sanıtarlyq-epıdemıologııalyq jaǵdaıdy turaqtandyrǵany úshin «Teńizshevroıl» kompanııasyna rızashylyǵyn bildirdi. Prezıdent Qazaqstannyń Densaýlyq saqtaý mınıstrligine jalpy quny 20 mıllıon AQSh dollary bolatyn medıtsınalyq buıymdardy, dári-dármekter men qorǵanysh quraldaryn bergeni, sheteldik dárigerler men epıdemıologtardyń elimizge kelýin uıymdastyrǵany, sondaı-aq, Qulsary qalasynda 200 oryndyq ınfektsııalyq aýrýhana qurylysyn qarjylandyrǵany úshin Maıkl Ýırtke alǵys aıtty.

Budan bólek, Qasym-Jomart Toqaev Teńizdegi jobalardy iske asyrýda qazaqstandyq úlesti qamtamasyz etýdiń mańyzdy ekenine nazar aýdardy. Bul rette, birlesken ınvestıtsııalyq jobalardy iske asyrý barysynda Jergilikti úles qoryn qurý jaǵyn qarastyrýdy usyndy.

Memleket basshysy Qarashyǵanaq munaı ken ornyn ıgerý máselelerine toqtalyp, atalǵan jobany ýaqytyly iske asyrýdy qamtamasyz etý jáne jylyna munaı óndirý kólemin 10-11 mıllıon tonna mólsherinde ustap turý qajettigin atap ótti.

Maıkl Ýırt 2019 jyly Qasym-Jomart Toqaevpen Nur-Sultan jáne Nıý-Iork qalalarynda áńgimelesken sátterin eske alyp, kezdesýge taǵy da múmkindik bergeni úshin alǵys aıtty.

«Bizdiń kóp jylǵy áriptestigimizdi joǵary baǵalaımyn. Qazaqstan – biz úshin erekshe el jáne kompanııamyzdyń jumysyndaǵy asa mańyzdy baǵyt. Sondyqtan biz Qazaqstannyń energetıka salasyndaǵy, atap aıtqanda, Teńiz jáne Qarashyǵanaq ken oryndaryndaǵy ózara is-qımyldardy jalǵastyrýǵa nıettimiz. Qazaqstan – munaı-gaz resýrstary bar keremet el jáne biz túrli jobalardy iske asyrýda elińizdiń senimdi seriktesi bolǵanymyzǵa qýanyshtymyz», – dedi «Shevron» kompanııasynyń atqarýshy dırektory.


Bizdiń kanalymyzǵa jazylyńyz:

Bólisińiz:
Pikir qaldyrý
+7
Jiberý
ONLAIN QYZMETKERLER
REDAKTOR
Gúlmıra Alıakparova
Gúlmıra Alıakparova
954-059
REDAKTOR
Jarylqasyn Saıagúl
Jarylqasyn Saıagúl
954-059

MURAǴAT