+7 (701) 759 90 19
USD 424.99 EUR 504.21
RUB 5.81 CNY 65.66
Jańalyqtar

Memleket basshysy Qazaqstan Ulttyq bankiniń esebin qabyldady

2021 jylǵy 14 mamyr 20:29
Bólisińiz:
Memleket basshysy Qazaqstan Ulttyq bankiniń esebin qabyldady

NUR-SULTAN. QazAqparat - Memleket basshysy Qasym-Jomart Toqaev Qazaqstan Ulttyq bankiniń esebin qabyldady, dep habarlaıdy Aqorda.

Qasym-Jomart Toqaev Ulttyq bank tóraǵasy men basqarma músheleriniń 2020 jyly júzege asqan aqsha-nesıe saıasatynyń qorytyndysy, Memleket basshysynyń daǵdarysqa qarsy bastamalarynyń oryndalýy, qarjylyq turaqtylyqty qamtamasyz etý jónindegi sharalar, Ulttyq banktiń altyn-valıýta rezervteriniń jaı-kúıi men Ulttyq qordyń aktıvteri týraly esebin tyńdady.

Erbolat Dosaev Prezıdentke buǵan deıin berilgen tapsyrmalardyń tolyq oryndalǵanyn baıandady. Ulttyq bank syrtqy faktorlardyń áseri jaǵdaıynda makroekonomıkalyq turaqtylyqty qamtamasyz etý, ekonomıkany qoldaý jáne proınflıatsııalyq qaterdi tómendetý úshin yntalandyratyn aqsha-nesıe saıasatyn júrgizdi. Qabyldanǵan sharalardyń nátıjesinde ınflıatsııa 8-8,5 paıyz deńgeıinde saqtalyp, jyl qorytyndysy boıynsha 7,5 paıyzdy qurady.


Prezıdenttiń tapsyrmasy boıynsha júrgizilip jatqan saıasattyń tıimdiligin arttyrý jáne ınflıatsııanyń shekti mejesin belgileýdiń tolyqqandy rejımine kóshý úshin Ulttyq bank Aqsha-nesıe saıasatynyń 2030 jylǵa deıingi strategııasyn ázirledi. Bazalyq mólsherleme jóninde sheshimder qabyldaý maqsatynda Aqsha-nesıe saıasaty komıtetin qurdy.

Memleket basshysyna zeınetaqy jınaqtaryn turǵyn úı jaǵdaıyn jaqsartý jáne basqa da maqsattarǵa paıdalaný jónindegi bastamanyń oryndalý barysy týraly málimet berildi. Bıylǵy 1 aqpannan bastap 1,3 trıllıon teńgege jýyq tólem jasaldy.

Ulttyq bank tóraǵasy Memleket basshysyna qolma-qol aqshasyz jasalatyn tólem úlesiniń artqany týraly málimet berdi. Bul qashyqtan sáıkestendirý qyzmetin engizýdiń, bankaralyq jáne ekvaırıngtik komıssııalar mólsherin azaıtýdyń arqasynda júzege asqan.

Ulttyq bank tóraǵasynyń esebin tyńdaǵan Qasym-Jomart Toqaev byltyrǵy koronavırýs pandemııasy men munaı baǵasynyń tómendeýi el ekonomıkasyna keri áser etkenin aıtty. Prezıdenttiń bastamasy boıynsha daǵdarysqa qarsy qabyldanǵan teńdessiz sharalar toptamasy ulttyq ekonomıkanyń qatty quldyraýyna múmkindik bermedi jáne iskerlik belsendilikti saqtap qalýǵa jol ashty.

«Ekonomıkalyq belsendilik tómendep ketti. Biraq der kezinde sharalar qabyldap, ahýaldy odan beter ýshyqtyrýǵa jol bergen joqpyz. Ulttyq bank ekonomıkany qoldaý jáne halyqty jumyspen qamtý sharalaryna 2,3 trıllıon teńge bóldi. Sonyń arqasynda jappaı jumyssyzdyqty boldyrmaı, bıznestegi iskerlik belsendilikti saqtaýǵa jaǵdaı jasap kelemiz. Qazirgi ýaqytta Ulttyq banktiń Úkimetpen áleýmettik-ekonomıkalyq salada tıimdi jumys isteýi aıryqsha mańyzdy», – dedi Memleket basshysy.


Prezıdent ınflıatsııany turaqtandyrý aqsha-nesıe saıasatynyń negizgi mindeti ekenin atap ótti. Vaktsınalaý jáne daǵdarystan keıingi qalypqa keltirý jumystaryndaǵy ilgerileýdiń arqasynda qarjylandyrýdyń qoljetimdiligi óte ózekti másele bolyp otyr.

Bul turǵyda iskerlik belsendiliktiń artýyna oraı Ulttyq banktiń ekonomıkany tikeleı qarjylandyrýy tómendeı berýi kerek.

«Pandemııa kezinde Úkimet meniń tapsyrmam boıynsha jalpy ekonomıkany, onyń ishinde, shaǵyn jáne orta bıznesti qoldaý úshin teńdessiz sharalar qabyldady. Quny 15 mıllıard dollar bolatyn daǵdarysqa qarsy sharalardyń 3 toptamasy júzege asyryldy. Árıne, memlekettiń bıznesti únemi qarjylandyra almaıtynyn túsingen jón. Ulttyq banktiń belsendi atsalysýy ekonomıkalyq belsendilik pen ekinshi deńgeıdegi bankterdiń belsendiligin qaıta qalpyna keltirýge yqpal etýi tıis. Sondyqtan nesıeleýdiń jeńildetilgen baǵdarlamasynyń aıaqtalýyna oraı memlekettik qoldaý sharalary naryqtyq mehanızmderge jol berýi kerek. Muny áleýmettik-ekonomıkalyq ahýaldy eskere otyryp, birtindep atqarý qajet», – dedi Prezıdent.


Memleket basshysynyń pikirinshe, pandemııa jaǵdaıynda jáne ekonomıkalyq ahýal nasharlaǵan kezde Ulttyq bank ózine júktelgen mindetti durys atqardy. 2020 jyly Ulttyq qordan jasalǵan transfert 55 paıyzǵa artyp, 4,8 trıllıon teńgege jetti. Ulttyq qordyń negizgi mindeti jáne álemdik daǵdarys jaǵdaıynda bul áreketter ózin aqtady.

«Úkimet osy jyly da Ulttyq qordan 4,6 trıllıon teńge surady. Bul – óte mol qarjy. Atalǵan qarajat daǵdarystan keıingi damýǵa baǵyttalyp, tıimdi jumsalýy kerek. Sonymen qatar ekonomıka qaıta qalpyna kelgennen keıin respýblıkalyq bıýdjet transfertke arqa súıemeýi qajet. Bul – Úkimetke júktelgen mindet. Keleshekte Ulttyq qordyń qarjysyn paıdalanýdy eń tómengi shekke deıin qysqartý kerek», – dedi Memleket basshysy.

Ulttyq banktiń Ulttyq qordy basqarýǵa baılanysty qyzmeti oń baǵalandy. 2020 jyldyń qorytyndysy boıynsha ınvestıtsııalyq tabys 7,6 paıyzdy qurady nemese 4,2 mıllıard dollarǵa jetti, al, bıylǵy 4 aıdyń ishinde 940 mıllıon dollar boldy. Prezıdent Reformalar jónindegi joǵary keńestiń otyrysyna Ulttyq qordy basqarýdy odan ári jetildirýge qatysty usynystar ázirlep, engizýdi tapsyrdy.


Sonymen qatar Úkimetke Ulttyq bankpen birlesip, fıskaldyq tártipti kúsheıtý úshin 2021 jyldyń sońyna deıin kontrtsıkldik bıýdjet erejesin zań júzinde bekitýdi tapsyrdy.

« Úkimet Ulttyq bankpen birlesip memlekettik qaryz alý saıasatyn júıeli túrde júrgizip keledi. Aldymyzda qor naryǵyn jańa deńgeıge shyǵarý úshin vedomstvoaralyq úılestirý jumystaryn arttyrý mindeti tur. Memlekettik qundy qaǵazdardy halyqaralyq ındeksterge engizý jónindegi is-qımyl josparyn júzege asyrý úshin Qarjy mınıstrliginiń, Ulttyq banktiń, Qarjy naryǵyn retteý jáne damytý agenttiginiń ózara is-qımylyn kúsheıtý kerek», – dedi Qasym-Jomart Toqaev.

Kıber qaýipterden qorǵaný máselesiniń ózektiligin eskere otyryp, qarjy sektorynyń kıber qaýipsizdigin qamtamasyz etý úshin Ulttyq bankke 2022 jyldyń 1 shildesine deıin jınaqtaýdyń, monıtorıngteýdiń jáne qarjy salasyndaǵy kıber daýlarǵa qarsy áreket etýdiń biryńǵaı tehnologııalyq platformasyn engizý tapsyryldy.

Memleket basshysy jıyndy qorytyndylaı kele Ulttyq banktiń jyldyq esebine oń baǵa berdi.

«Búgingi talqylaýlardy eskere otyryp, Ulttyq banktiń 2020 jyldyń qorytyndysy boıynsha bergen esebin oń baǵalaımyn. Qazirgi jaǵdaıda qarjylyq turaqtylyqty qamtamasyz etý óte mańyzdy dep sanaımyn. Ulttyq bank Agenttikpen birlesip, aqsha-nesıe saıasatynyń tıimdiligin jáne qarjy sektorynyń áleýetin arttyrý jumystaryn jalǵastyrýy qajet», – dedi Qasym-Jomart Toqaev.

Jıynǵa Premer-Mınıstrdiń birinshi orynbasary Álıhan Smaıylov, Ulttyq ekonomıka mınıstri Áset Erǵalıev, Qarjy naryǵyn retteý jáne damytý agenttiginiń tóraıymy Mádına Ábilqasymova qatysty.


Bizdiń kanalymyzǵa jazylyńyz:

#Aqorda  
Bólisińiz:
Sondaı-aq... oqyńyz
Pikir qaldyrý
+7
Jiberý
ONLAIN QYZMETKERLER
REDAKTOR
Kojakeldıev E.
Kojakeldıev E.
954-059

MURAǴAT