Memleket basshysy Ekonomıkalyq yntymaqtastyq jáne damý uıymynyń Bas hatshysymen kezdesti

2022 jylǵy 30 qarasha, 18:53
Memleket basshysy Ekonomıkalyq yntymaqtastyq jáne damý uıymynyń Bas hatshysymen kezdesti

PARIJ. QazAqparat - Memleket basshysy Ekonomıkalyq yntymaqtastyq jáne damý uıymynyń Bas hatshysy Matıas Kormanmen kezdesti, dep habarlaıdy Aqorda.

Memleket basshysy Frantsııaǵa jasaǵan resmı sapary aıasynda Ekonomıkalyq yntymaqtastyq jáne damý uıymynyń Bas hatshysy Matıas Kormanmen kezdesý ótkizdi. Kezdesý barysynda Prezıdent Qazaqstan men EYDU arasyndaǵy tabysty yntymaqtastyq deńgeıin atap ótti.

«Keshe Prezıdent Makronmen kezdesýde biz ekijaqty qarym-qatynasymyzdyń kóptegen aspektisine qatysty ustanymdarymyzdy naqtylap, mańyzdy qujattarǵa qol qoıdyq. Sonymen qatar Ekonomıkalyq yntymaqtastyq jáne damý uıymymen ózara baılanys Qazaqstan úshin árqashan basym baǵyttyń biri bolǵanyn atap ótkim keledi. Sizdiń uıymyńyzben baılanysymyzdy saqtaýǵa nıettimiz. Sondaı-aq elimizdiń ekonomıkalyq damýyna qatysty uıymnyń usynystary men keńesteri úshin rızashylyǵymyzdy bildiremiz», – dedi Prezıdent.

Uıymmen yntymaqtastyq ornatqaly beri Qazaqstan EYDU-nyń 42 quqyqtyq qujatyna qol qoıǵan, 37 organynyń jumysyna qatysady jáne túrli salalyq qujattyń belsendi múshesi. Sonymen qatar Qazaqstan EYDU-nyń Eýrazııa elderiniń básekege qabiletin arttyrý, jemqorlyqpen kúres jáne jasyl ekonomıkany damytý jónindegi óńirlik bastamalaryna belsendi túrde qoldaý kórsetedi. Memleket basshysynyń aıtýynsha, Qazaqstan Úkimeti men EYDU arasynda qol qoıylǵan Ózara túsinistik týraly memorandým aıasyndaǵy birlesken bastamalardyń aýqymyn keńeıtý uıymmen yntymaqtastyqty odan ári jalǵastyrýda mańyzdy qadam bolady. Óz kezeginde Matıas Korman Qazaqstannyń uıymmen tabysty yntymaqtastyǵyn oń baǵalaıtynyn jetkizdi. Kezdesý nátıjesinde Qazaqstan Respýblıkasy Úkimeti men Ekonomıkalyq yntymaqtastyq jáne damý uıymy arasyndaǵy Ózara túsinistik týraly memorandýmǵa ózgerister engizý týraly hattamaǵa qol qoıyldy. Sondaı-aq Memleket basshysy uıymnyń «Qurmetti qonaqtar kitabyna» estelik qoltańba qaldyrdy.


Foto: akorda.kz


Seriktester jańalyqtary

Jańalyqtar