Medıtsınalyq qaldyqtardy joıatyn kásiporynnan densaýlyqqa zııan bar - SQO turǵyndary
2022 jylǵy 10 tamyz 14:55

Medıtsınalyq qaldyqtardy joıatyn kásiporynnan densaýlyqqa zııan bar - SQO turǵyndary

PETROPAVL. QazAqparat – Soltústik Qazaqstan oblysyndaǵy Maloe Beloe eldi mekeninde bir jylda 4 adam leıkemııadan qaıtys boldy. Muny jergilikti turǵyndar osyndaǵy kásiporynnyń jumysymen baılanystyrady, dep habarlaıdy QazAqparat tilshisi.

SQO Qyzyljar aýdany Maloe Beloe eldi mekeniniń turǵyny Evgenıı Nıkıforovtyń aıtýynsha, 30 shaqty úıi bar aýyl halqyn osyndaǵy kásiporyn ýlap jatyr. Zaýyt medıtsınalyq qaldyqtardy joıýmen aınalysady.

«Kúndiz kóbine peshterin jaǵa qoımaıdy, negizinen túnde jumys isteıdi. Qoıý, ay tútinnen esik-terezemizdi asha almaımyz. Bul jerde jaramdylyq merzimi ótken dárilerden bastap, qoldanylǵan ınelerdi, túrli ydystardy, tipti otadan keıin kesilgen aıaq-qoldardy da órteıdi. Al, odan ushqan kúl bizdi ýlap jatyr. Tek bir jyldyń ishinde aýylda tórt adam qan obyrynan qaıtys boldy. Qazir balalarymyzdyń báriniń allergııasy bar. Kózderi jasaýrap, túshkire beredi. Bul máseleni kótergenimizge birneshe jyl boldy. Kásiporyndaǵylar sen nege tynysh otyrmaısyń, bizdiń senderdi ýlaýǵa ruqsatymyz bar dep aıtady», - deıdi eldi meken turǵyny.

Eldi meken qaraıtyn Asanov aýyldyq okrýginiń ákiminiń aıtýynsha, «Ekomed-farmatsııa» JShS aýylda 2019 jyldan bastap jumys istep keledi.

«Aqpan aıynda kásiporynnyń lıtsenzııasynyń merzimi aıaqtaldy. Qazir ruqsat alý úshin qujattaryn daıyndap jatyr. Buǵan deıin másele týyndaǵan emes. Olar qoldanylǵan ınelerdi joıýmen aınalysady», - deıdi aýyl ákimi Serikbaı Qazeev.

Máseleni SQO boıynsha «Adaldyq alańy» jobalyq keńsesi baqylaýǵa almaq.

«JShS bar, alaıda lıtsenzııasy joq. Biz SQO ekologııa departamentine aryz jazamyz, bul tekseristi bastaýǵa negiz bolady. Osylaısha kásiporynnyń ruqsatsyz jumys istegenin dáleldeýimiz kerek. Sondaı-aq, polıtsııaǵa júginip, qyzmettik tergeý júrgizýin suraımyz», - deıdi SQO boıynsha «Adaldyq alańy» jobalyq keńsesiniń jetekshisi Rýslan Asaýbaev.

Uqsas jańalyqtar
Seriktester jańalyqtary

Jańalyqtar

Úrdis

MURAǴAT