Medeýge Almatydaǵy eń úlken Memlekettik tý ornatyldy

ALMATY. QazAqparat – Medeý muz aıdynynyń mańyna Almatydaǵy eń úlken Memlekettik tý ornatyldy, dep habarlaıdy QazAqparat.

Saltanatty sharaǵa tanymal sportshylar men jastar uıymdarynyń ókilderi qatysty.

«Almatyda Kók baıraqty kóterý sımvoldyq mánge ıe. Almaty – Qazaqstannyń maqtanyshy. Dál osy jerde Tuńǵysh Prezıdent-Elbasy Nursultan Nazarbaev elimizdiń táýelsizdigin jarııalap, memlekettik rámizder, Konstıtýtsııa jáne ulttyq teńgemiz qabyldandy. Sondaı-aq Týdyń naqty Medeýge ornalastyrylýy teginnen emes. Sebebi, dál osy jerde otandyq jáne álemdik sportshylardyń qatysýymen júzdegen álemdik rekordtar ornatyldy. Sol sııaqty bul jerde Azıada men Ýnıversıada ótti. Memleket basshysy Qasym-Jomart Toqaev aıtqandaı: «Qazaqstannyń baıraǵy kók aspanda samǵaǵanda elimiz úshin, táýelsizdiktiń arqasynda jetken jetistikterimiz úshin júregimizdi maqtanysh kerneıdi«. Ulttyq basketbol federatsııasyna osyndaı keremet syı úshin úlken rahmet!», - dedi «Nur Otan» partııasy tóraǵasynyń birinshi orynbasary Baýyrjan Baıbek.

Sharaǵa qatysqan Olımpıada chempıony Jaqsylyq Úshkempirov sporttyń arqasynda álemniń kóptegen elderinde bolǵanyn, biraq onyń basty mahabbaty óz eli bolǵanyn aıtty.

«Bul jerge qamqor bolý jáne onyń órkendeý jolynda eńbek etý keleshek urpaqtyń enshisinde. Naq sol jastar sportshylarymyzdyń Qazaqstan Týyn jelbiretip, Ánuranyn áýeletý dástúrin jalǵastyrady. Medeýge kelgen árbir jerlesimiz jelbirep turǵan Kók týymyzdy kórip, Otany úshin maqtanatyn bolady», - dedi ardager sportshy.

Aıta ketsek, Medeýge Memlekettik týdyń ornatylýy Ulttyq basketbol federatsııasynyń bastamasymen «Nur Otan» partııasynyń jáne Almaty qalasy ákimdiginiń qoldaýymen júzege asyryldy. Týtuǵyrdyń bıiktigi - 40 metr. Týdyń eni - 7 metr, uzyndyǵy - 14 metr.