Májilis tóraǵasy zań jobalaryna qatysty mınıstrlerdi synady
2022 jylǵy 30 maýsym 11:21

Májilis tóraǵasy zań jobalaryna qatysty mınıstrlerdi synady

NUR-SULTAN. QazAqparat - Búgin Parlament palatalarynyń birlesken otyrysynda Májilis tóraǵasy Erlan Qoshanov zań shyǵarý protsesindegi kemshilikterdi atady, dep habarlaıdy QazAqparat tilshisi.

«Parlament pen Úkimettiń birlesip tıimdi jumys istegenin aıta otyryp, zań shyǵarý protsesine teris áser etetin jekelegen kemshilikterdi de atap ótken jón. Júıeli kemshilikterdiń biri – durys josparlamaý, zań jobalarynyń jetkilikti pysyqtalmaýy jáne daıyn bolmaýy. Úkimettiń kóbinese merzim jaqyndaǵan kezde belsendiligi arta bastaıdy. Muny, ádette, jyldyń nemese sessııanyń sońynda baıqaýǵa bolady», - dedi E. Qoshanov.

Onyń aıtýynsha, Parlament qabyrǵasynda zań jobalarynyń kóptegen normalaryn qaıta óńdep shyǵý, jekelegen normalar boıynsha Úkimet músheleriniń naqty ustanymynyń bolmaý úrdisi qalyptasty.

«Mysaly, densaýlyq týraly kodekstiń bir normasy tek birinshi jartyjyldyq ishinde

qarama-qarsy pozıtsııada eki ret túbegeıli ózgerdi. Qańtar aıynda elimizde tirkelgen dárilik zattar men medıtsınalyq buıymdardy shekti baǵasyz satyp alýǵa jáne birlesip tóleýge jol berilmeıdi degen norma qabyldandy. Alaıda maýsym aıynda bul norma qaıta alyp tastaldy. Eki jaǵdaıda da ózgeristiń qajettiligi halyqtyń dári-dármeksiz qalýy múmkin degen ýájben túsindirildi. Mundaı faktiler birli-jarym emes»,- dedi Májilis tóraǵasy.

Onyń sózine qaraǵanda, qaralyp jatqan zań jobalaryna ózgerister tolassyz engiziledi, olardyń ishinde jobanyń tujyrymdamasyna saı kelmeıtin túzetýler de bar.

«Sonyń saldarynan zań jobasynyń bastapqy kontseptsııasy aıtarlyqtaı ózgeredi. Mınıstrler depýtattar arqyly ózderiniń «janyp turǵan» máselelerin sheship qalǵysy keletin jaǵdaılar da bar. Bul Májiliste de, Senatta da qaralý satysynda kezdesedi. Osynyń saldarynan Májilis maquldaǵan zań jobasyn Senat túzetýlermen qaıtarýǵa májbúr bolady. Kóp jaǵdaıda bul jańa túzetýler – Májiliste usynylmaǵan jáne talqylanbaǵan normalar bolyp keledi. Zań jobalaryn sapasyz daıyndaý jáne saraptamalardy ýaqtyly júrgizbeý Memleket basshysy alǵa qoıǵan mindetterdi iske asyrýǵa kedergi keltirýi múmkin», - dedi ol.

«Depýtattardyń túzetýlerine qorytyndylardyń ýaqtyly berilmeýi de erekshe nazar aýdarýdy qajet etedi. Mysaly, bala quqyqtaryn qorǵaý jónindegi zań jobasy boıynsha Úkimettiń jaýaby 5 aıdan keıin keldi. Sonyń saldarynan, bul zań Májiliske engizilgennen keıin eki jyl ótken soń ǵana qabyldandy. Zań jobalaryn Parlamenttiń qos Palatasynda tanystyrý kezinde jekelegen mınıstrlikter men vedomstvolar baıandamashylarynyń daıyndyǵy jetkiliksiz bolatyn jaǵdaılar da kezdesedi. Zań jobalary men saraptamalardyń sapasyn baǵalaý aldaǵy ýaqytta da Parlamenttiń erekshe baqylaýynda bolady», - dedi Májilis tóraǵasy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT