Májilis depýtaty qańtar oqıǵasy boıynsha qamaýda otyrǵandardyń jaǵdaıyn kórdi
2022 jylǵy 4 shilde 21:30

Májilis depýtaty qańtar oqıǵasy boıynsha qamaýda otyrǵandardyń jaǵdaıyn kórdi

ÓSKEMEN. QazAqparat – QR Parlamenti Májilisiniń depýtaty Irına Ýnjakova Óskemen qalasyndaǵy tergeý ızolıatorynda bolyp, qańtar oqıǵasyna qatysqan adamdardy ustaý jaǵdaıyn kórdi, dep habarlaıdy QazAqparat tilshisi.

«Májilis depýtaty departament basshysy Janbolat Káletaevpen birge qańtardaǵy jappaı tártipsizdikke qatysqandardyń otyrǵan jerlerin aralap shyqty. Munda qazir atalǵan oqıǵa boıynsha 15 adam qamaýda. Irına Ýnjakova tergeýdegi jáne qamaýǵa alynǵandardyń quqyqtarynyń saqtalý deńgeıimen tanysyp, birnesheýimen áńgimelesti», - dep habarlady ShQO boıynsha QAJ departamenti baspasóz qyzmetinen.

Kúdiktiler men aıyptalýshylar depýtatqa ózderin tolǵandyrǵan suraqtaryn qoıdy. Sondaı-aq, ızolıatorda qandaı da bir azaptaý faktileriniń joqtyǵyn aıtty.

Esterińizge sala ketsek, Óskemen jáne Semeı qalalarynda qańtardaǵy jappaı tártipsizdikke qatysý, bılik ókilderine qarsy kúsh qoldaný, oq-dárilerdi, esirtki quraldaryn zańsyz saqtaý, arnaıy tehnıkany aıdap áketý, terrorızm aktileri kúdigimen 130 adam ustalǵan bolatyn.


Uqsas jańalyqtar

Jańalyqtar

Úrdis

MURAǴAT