Maýsym aıynda Nur-Sultanda koronavırýspen aýyrǵandar eki ese ósti
2022 jylǵy 5 shilde 16:13

Maýsym aıynda Nur-Sultanda koronavırýspen aýyrǵandar eki ese ósti

NUR-SULTAN. QazAqparat - Aǵymdaǵy jyldyń maýsym aıynyń úshinshi onkúndiginen bastap elordada koronavırýstyq ınfektsııa jaǵdaılarynyń ósimi baıqalady, dep habarlaıdy QazAqparat qalalyq sanıtarııalyq-epıdemıologııalyq baqylaý departamentine silteme jasap.

Naýqastardyń kóbeıýiniń negizgi sebepteri - turǵyndar arasynda buryn aınalymda bolǵan «Omıkron» shtammynyń jandanýy jáne vırýstyń taralýy úshin ońtaıly jaǵdaıdyń bolýy, atap aıtqanda, halyqtyń ımmýndyq qabatynyń tómendeýi áserinen, jazǵy demalystyń bastalýyna baılanysty týrıstik aǵynnyń ulǵaıýy.

«Eger aýrýdyń kúrt tómendeýi kezeńinde (naýryz – maýsymnyń alǵashqy 20 kúni) oqshaýlanǵan jaǵdaılar tirkelgen bolsa, qazirgi ýaqytta vırýs juqtyrǵandardyń sany 55-ke jetti jáne aýrýdyń táýliktik kórsetkishi 5-7 ese artty (eń joǵary táýliktik tirkeý 30 maýsymda oryn aldy). Tıisinshe, maýsym aıynda syrqattanýshylyq deńgeıi ótken aıdyń kórsetkishinen 3,3 ese asyp tústi», - dep jazdy vedomstvo.

Mekemeniń málimetinshe, bıylǵy maýsym aıynda 269 naýqastan vaktsınatsııany taldaý kezinde 169-ynda nemese 69%-da COVID-19-ǵa qarsy ımmýnıtettiń joqtyǵy anyqtaldy, ıaǵnı bul adamdar vaktsınatsııa almaǵan. Ekpe qabyldaǵan 88 adamnyń 85-inde nemese 96%-ynda 2 dozany qabyldaǵannan beri 6 aıdan astam ýaqyt ótti jáne naýqastardyń tek 4,4%-y, ıaǵnı 12 adam ǵana revaktsınatsııa qabyldaǵan.

Nur-Sultan qalasynyń Sanıtarııalyq-epıdemııalogııalyq baqylaý departamenti astanalyqtardy qoldy únemi tazalaý, áleýmettik qashyqtyqty saqtaý, adamdar kóp jınalatyn jerlerde betperde taǵý sııaqty epıdemııaǵa qarsy is-sharalardy saqtaýǵa jáne vaktsınatsııanyń, revaktsınatsııanyń tolyq kýrsynan ótýge jáne býsterlik dozany alýǵa shaqyrady.

«Syrqattanǵandar boıynsha statıstıkaǵa nazar aýdarsaq, aýyrǵandar arasynda úlken úles vaktsınatsııalanbaǵan azamattarǵa tıesili. Tek jumyla jáne jaýapty azamattyq ustanymmen biz ujymdyq ımmýnıtetti qalyptastyra alamyz, osylaısha ınfektsııanyń qoǵam arasynda odan ári taralýyna jol bermeımiz», - delingen habarlamada.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT