Máýlen Áshimbaev TÚRKSOI-dyń bas hatshysymen kezdesti
2022 jylǵy 27 maýsym 20:46

Máýlen Áshimbaev TÚRKSOI-dyń bas hatshysymen kezdesti

NUR-SULTAN. QazAqparat - Qazaqstan Respýblıkasy Parlamenti Senatynyń tóraǵasy Máýlen Áshimbaev Túrki mádenıeti halyqaralyq uıymynyń bas hatshysy Sultan Raevpen kezdesti.

Máýlen Áshimbaev kelesi jyly TÚRKSOI-dyń qurylǵanyna 30 jyl tolatynyn, osy jyldar ishinde uıymnyń uıytqy bolýymen túrki áleminiń yntymaqtastyǵyn arttyrýǵa arnalǵan mańyzdy is-sharalar men jobalar iske asyrylǵanyn aıtty.

«Túrki memleketteriniń mádenı-gýmanıtarlyq baılanysyn arttyrý turǵysynan TÚRKSOI-dyń mańyzy zor. Sońǵy jyldarda túrki álemi elderiniń yntymaqtastyǵy jańa deńgeıge kóterildi. Bul rette bizdiń memleket basshylarymyz qabyldaǵan sheshimderdiń yqpaly mol ekenin atap ótken jón. Osyndaı joǵary deńgeıde qol jetkizilgen ýaǵdalastyqtardy iske asyrýǵa túrki elderiniń Parlamentteri de úlken úles qosyp keledi. Sondyqtan biz parlamentaralyq is-sharalar men kezdesýler kezinde mádenıet jáne óner salasyndaǵy máselelerge basa mán beremiz», – dedi Máýlen Áshimbaev.

Sonymen qatar Senat tóraǵasy aldaǵy qyrkúıek aıynda ótetin Álemdik jáne dástúrli dinder lıderleriniń VII sezi týraly sóz qozǵady.

Onyń aıtýynsha, bul forým túrli din ókilderi arasynda tıimdi ózara baılanys ornatýǵa jáne yntymaqtastyqty nyǵaıtýǵa yqpal etedi.

Máýlen Áshimbaev sezd hatshylyǵynyń basshysy retinde Sultan Raevty atalǵan dinı forýmǵa qatysýǵa shaqyrdy.

Óz kezeginde, TÚRKSOI-dyń bas hatshysy túrki álemine ortaq kórnekti tulǵalar men jazýshylardyń mereıtoılaryna qatysty josparlanǵan is-sharalar týraly aıtty.

Sondaı-aq ol Túrkistan qalasynyń túrki áleminiń astanasy retindegi rólin kúsheıtýdiń mańyzyna toqtaldy.

Kezdesý sońynda Máýlen Áshimbaev Qazaqstan Parlamentiniń Senaty uıym aıasynda túrki memleketteri arasyndaǵy mádenı yntymaqtastyqty odan árin nyǵaıtý úshin belsendi jumys isteýge daıyn ekenin jetkizdi.


Jańalyqtar

Úrdis

MURAǴAT