Jańalyqtar  >
Máskeýdegi Halyq sharýashylyǵy jetistikteri kórmesinde Qazaqstan pavılony úzdik dep tanyldy
2022 jylǵy 13 tamyz 13:35

Máskeýdegi Halyq sharýashylyǵy jetistikteri kórmesinde Qazaqstan pavılony úzdik dep tanyldy

NUR-SULTAN. QazAqparat - Halyq sharýashylyǵy jetistikteri kórmesiniń Qazaqstan pavılony Máskeýdegi eń úzdik qalpyna keltirilgen joba dep tanyldy, dep habarlaıdy QazAqparat Qazaqstannyń Reseı Federatsııasyndaǵy elshiligine silteme jasap.

«Halyq sharýashylyǵy jetistikteri kórmesindegi «Qazaqstan» pavılony «Qurylys salasyndaǵy eń úzdik iske asyrylǵan joba» baıqaýynyń «Mádenı mura obektisin zamanaýı paıdalanýǵa beıimdeý jáne qaıta qalpyna keltirý» nomınatsııasy boıynsha jeńimpaz atandy»,-delingen habarlamada.

Qazaqstannyń Reseıdegi elshiliginiń habarlaýynsha, marapattaý rásimi búgin (dástúr boıynsha Qurylysshylar kúni qarsańynda) «Manej» saýda-kórme ortalyǵynda Máskeý meri Sergeı Sobıanınniń qatysýymen ótti.

Baıqaýdy Máskeýdiń Qala qurylysy saıasaty departamenti 2000 jyldan beri ótkizip keledi jáne astanadaǵy eń bedeldi kásibı marapattardyń biri bolyp tabylady.

Bul joly baıqaýǵa 2021 jyly paıdalanýǵa berilgen 107 joba qatysty. Qatysýshylar qurylystyń negizgi baǵyttaryn qamtıtyn turǵyn úıler men medıtsınalyq jáne bilim berý mekemeleriniń qurylysynan bastap kóshe jáne jol jelisi obektilerine, metropolıtenge deıin, mádenı mura nysandaryn qalpyna keltirý jáne zamanaýı paıdalanýǵa beıimdeý sııaqty 12 nomınatsııa boıynsha usynyldy. Jeńimpazdardy saraptamalyq keńes pen qalalyq baıqaý komıssııasy anyqtady.

Eske sala keteıik, Halyq sharýashylyǵy jetistikteri kórmesindegi «Qazaqstan» pavılony 2021 jyldyń sońynda keń aýqymdy qaıta qalpyna keltirý jumystarynan keıin ashyldy. Pavılonǵa HH ǵasyrdyń ortasyndaǵy tarıhı kelbeti qaıtaryldy. Jeltoqsanda ol Máskeý úkimetiniń «Máskeýlik qalpyna keltirý – 2021» baıqaýynyń laýreaty atandy, al shildede qaıta qalpyna keltirýge qosqan úlesi jáne is-sharanyń kún tártibine belsendi jumysy úshin Halyq sharýashylyǵy jetistikteri kórmesiniń «Altyn belgisimen» marapattaldy.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT