Mańǵystaýda jyl sońyna deıin 1600 adam munaı-gaz salasyna jumysqa ornalastyrylmaq
2022 jylǵy 30 maýsym 12:35

Mańǵystaýda jyl sońyna deıin 1600 adam munaı-gaz salasyna jumysqa ornalastyrylmaq

NUR-SULTAN. QazAqparat – Mańǵystaý oblysynda jyl sońyna deıin 1600-den astam adamdy munaı-gaz salasyna jumysqa alý josparlanǵan. Oblys ákimi Nurlan Noǵaev ortalyq kommýnıkatsııalar qyzmetinde ótken brıfıngide osyndaı derek keltirdi, dep habarlaıdy QazAqparat tilshisi.

«Jetibaı, Jańaózen sııaqty eldi mekenderdiń halqy jumyssyzdyq máselesi boıynsha, ár túrli sebeptermen mıtıngilerde tur. Jalpy, Mańystaý oblysyndaǵy jumyssyzdyq máselesin qalaı sheshýge bolady dep oılaısyz», - dep surady BAQ ókili.

Nurlan Noǵaevtyń aıtýynsha, Mańǵystaý oblysynda dástúrli taý-ken, munaı-gaz, aýyl sharýashylyǵy, týrızm, kólik-logıstıka salasynda jumys oryndaryn ashý múmkindigi bar.

«Sonyń ishinde munaı-gaz salasyndaǵy bosaǵan jumys oryndaryna 882 jańa jumysshy qabyldandy. Jyldyń aıaǵyna deıin 1600-den astam jumysshy alýdy josparlap otyrmyz. Biraq búkil jumyssyzdardy munaı-gaz salasyna kirgizý múmkin emes. Biz qabylda dep otyrǵan azamattardyń kóbiniń tıisti bilimi nemese biliktiligi joq. Sony eskerip, mekemeler ózderine qajetti mamandardy daıyndaý kýrstaryn uıymdastyryp jatyr», - dedi ákim.

Aıtýynsha, Jańaózen qalasynda jumysyzdyqpen kúrestiń jeke algorıtmi bar.

«Sol algorıtm boıynsha jumys júrip jatyr. Ol jumystardyń ashyqtyǵyn, ádildigin tazalyǵyn qamtamasyz etý úshin ony tsırflyq formatqa kóshirý qolǵa alynǵan, jalǵasyp jatyr. Sáıkesinshe joǵaryda atalǵan salalardyń damýy jańa jumys oryndarynyń ashylýyna úlken septigin tıgizedi dep otyrmyz.

Mysaly jyly jaǵajaıda ashylǵan jumys oryndarynda 800-den astam mańǵystaýlyq jumys istep jatyr. Bul tájirıbe alý jónindegi, jańa biliktilik alý jónindegi máselelerdi sheshýge yqpal etedi», - dedi Nurlan Noǵaev.

Eske salsaq, keshe QR Májilis depýtaty Edil Jańbyrshın Úkimet basshysy Álıhan Smaıylovtyń atyna Mańǵystaý oblysyndaǵy eńbek daýlary týraly saýal joldaǵan edi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT