Mańǵystaýda ıtbalyqtardyń qyrylýyna baılanysty zertteý júrgiziledi
2022 jylǵy 27 sáýir 07:48

Mańǵystaýda ıtbalyqtardyń qyrylýyna baılanysty zertteý júrgiziledi

NUR-SULTAN. QazAqparat - Kaspıı teńizinde 50-deı ıtbalyqtyń denesi tabyldy. Osyǵan baılanysty ıtbalyqtyń qyrylý sebebin zertteý júrgiziledi, dep habarlaıdy QR EGTRM Balyq sharýashylyǵy komıtetiniń baspasóz qyzmeti.

«2022 jyly 26 sáýirde áleýmettik jelilerdegi aqparatqa monıtorıng júrgizý barysynda Kaspıı teńiziniń jaǵalaýynda «Qarajanbas» ken ornynyń sý bógeti mańynda óli ıtbalyqtardyń 50-ge jýyq ushasy tabylǵany týraly aqparat anyqtaldy. Oqıǵa ornyna Jaıyq-Kaspıı oblysaralyq basseındik balyq sharýashylyǵy ınspektsııasynyń Mańǵystaý oblysy boıynsha balyq ınspektsııasy basqarmasynyń memlekettik ınspektorlary shuǵyl attandy» delingen habarlamada.

Jaýapty memlekettik organdar arasynda sý janýarlarynyń jappaı qyrylý jáne qaýip-qaterin anyqtaý úshin jumys toby qurylyp jatyr.

«2022 jyly 26 sáýir saǵat 23:00-ge deıin kelip túsken aqparatqa sáıkes, teńiz jaǵalaýynyń árbir jerinde jatqan 22 óli ıtbalyq tabyldy. Itbalyqtardyń ólý sebebin anyqtaý úshin janýarlardyń ushalaryn zerthanalyq tekserýge alý múmkindigi qarastyrylýda. Mańǵystaý oblystyq balyq ınspektorlary balyq sharýashylyǵy sýbektileriniń qoryqshylyq qyzmetimen birlesip, Kaspıı teńiziniń jaǵalaý aımaǵy men basqa da ýchaskelerin baqylaýda. Zertteý júrgizý úshin birneshe ıtbalyqtan, teńiz sýy men topyraqtan synama alynǵan. Olar Ekologııa departamenti men veterınarlyq qyzmetine tapsyrylady» dep habarlandy vedomstvodan.

27 sáýirde atalǵan organ qyzmetkerleri oqıǵa ornyna barady.

Sonymen qatar, atalǵan fakti týraly QR BǴM Ǵylym komıtetiniń «Mıkrobıologııa jáne vırýsologııa ınstıtýty» zerthanasynyń qyzmetkerlerine, sondaı-aq «Gıdrobıologııa jáne ekologııa ınstıtýty» Batys Qazaqstan mekemesiniń qyzmetkerlerine habardar etildi. Jaǵalaýdy baqylaý jumystary jalǵasýda.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT