Mańǵystaý oblysy ákimdiginde eki basqarmanyń basshysy aýysty
2022 jylǵy 23 sáýir 13:13

Mańǵystaý oblysy ákimdiginde eki basqarmanyń basshysy aýysty

AQTAÝ. QazAqparat - Mańǵystaý oblysy ákimdiginiń Týrızm jáne Іshki saıasat basqarmalaryna jańa basshylar taǵaıyndaldy. QazAqparat bul týraly ákimdiktiń baspasóz qyzmetine silteme jasap habarlaıdy.

Atap aıtqanda, Týrızm basqarmasynyń basshysy bolyp Prezıdenttik jastar kadr rezerviniń múshesi Danııar Óteshov taǵaıyndaldy.

Danııar Óteshov Q. Sátbaevtyń atyndaǵy Qazaq ulttyq tehnıkalyq ýnıversıtetin «Qurylys» mamandyǵy, Nazarbaev Ýnıversıtetin «Іskerlik ákimshilik» mamandyǵy boıynsha bitirgen. Aǵylshyn tilin erkin meńgergen.

Eńbek jolyn 2014 jyly «Atash-Servıs» JShS dırektory retinde bastady. 2015 jyldan 2017 jylǵa deıin «Aqtaý-Azımýt» JShS dırektorynyń orynbasary boldy. 2017 jyly Aqtaý qalalyq qurylys bóliminiń sektor meńgerýshisi, 2017 jyldyń tamyz aıynan bastap qazirgi tańǵa deıin «Aqtaý-Azımýt» JShS dırektory qyzmetin atqardy.

Іshki saıasat basqarmasynyń basshysy bolyp Nurtas Salı taǵaıyndaldy.

Nurtas Salı «Memlekettik jáne jergilikti basqarý» mamandyǵy boıynsha L. Gýmılev atyndaǵy Eýrazııa ulttyq ýnıversıtetin bitirgen.

Eńbek jolyn 2014 jyly «Mańǵystaý-Medıa» JShS-da kontent-menedjeri bolyp bastaǵan. 2014-2017 jyldary – Mańǵystaý oblysy ishki saıasat basqarmasynyń bas mamany. 2017 - 2019 jyldary Mańǵystaý oblysy ishki saıasat basqarmasynyń bólim basshysy, 2019 jyldan 2022 jylǵa deıin ishki saıasat basqarmasy basshysynyń orynbasary bolyp jumys istedi.

2022 jyldyń naýryz aıynan qazirgi ýaqytqa deıin Mańǵystaý oblysynyń jastar saıasaty máseleleri basqarmasy basshysynyń mindetin atqardy.

Óńir basshysy Nurlan Noǵaev basqarmalar ujymdaryna jańa basshylardy tanystyryp, eńbekterine tabys tiledi.


Uqsas jańalyqtar

Jańalyqtar

Úrdis

MURAǴAT