MÁMS aıasynda 121 myń astanalyq tegin dári-dármekpen qamtyldy
2022 jylǵy 19 mamyr 19:41

MÁMS aıasynda 121 myń astanalyq tegin dári-dármekpen qamtyldy

NUR-SULTAN. QazAqparat – Mindetti áleýmettik medıtsınalyq saqtandyrý júıesi aıasynda 4 mlrd 370 mln teńgege tegin beriletin dári-dármek satyp alyndy. Bul týraly mindetti áleýmettik medıtsınalyq saqtandyrý qorynyń Nur-Sultan qalasy boıynsha fılıalynyń dırektory Nurlybek Qabdyqaparov málim etti, dep habarlaıdy QazAqparat tilshisi.

«Bıyl 1 mamyrdaǵy jaǵdaıǵa sáıkes Nur-Sultan qalasynda 4 mlrd 370 mln teńgege (306 211 retsept boıynsha) 121 886 patsıent tegin dári-dármekpen qamtamasyz etildi. Olardyń ishinde MÁMS júıesi aıasynda respıratorlyq ınfektsııamen joǵary tynys alý aýrýlary boıynsha 683 bala jáne tómengi tynys joldarynyń aýrýlary boıynsha 2182 bala. Sonymen qosa temirjetispeýshiligi anemııasymen 290 bala, rahıt aýrýy 324, pnevmonııa 598, sınýsıtpen, badamsha bezi (mındalın) jáne adenoıd aýrýlarymen 158 bala tegin dárimen qamtyldy», - dedi Nurlybek Qabdyqaparov ZOOM platformasy arqyly ótken baspasóz máslıhatynda.

Onyń aıtýynsha, emhanalarda MÁMS júıesi aıasynda tegin beriletin barlyq preparat qoljetimdi.

«Aqparattyq júıelerden alynǵan málimetter boıynsha, josparly emdeýge jatqyzýdy kútý merzimi ótken jyldyń sáıkes kezeńimen salystyrǵanda 1,9%-ǵa ósken. Sonymen qatar bıyl ota jasaý kórsetkishi 16,5%-ǵa ósti. Sol sııaqty joǵary tehnologııalyq medıtsınalyq kómek qoldanysy arqyly MÁMS aıasynda 4,4 mlrd teńge somasyna qosymsha 1 549 qyzmet kórsetildi. Kardıohırýrgııalyq ota 565 patsıentke jasalsa, neırohırýrgııalyq ota (neıronavıgatsııalyq júıe qoldanylǵan) – 71 adamǵa jáne 70 patsıentke ortopedııalyq ota jasaldy», - deıdi ol.


Uqsas jańalyqtar

Jańalyqtar

MURAǴAT