Mádenıet qyzmetkerleriniń jalaqysy ósedi – mınıstr
2022 jylǵy 24 maýsym 20:02

Mádenıet qyzmetkerleriniń jalaqysy ósedi – mınıstr

NUR-SULTAN. QazAqparat - Elimizdegi «ulttyq» statýsyna ıe mádenıet salasyndaǵy uıym qyzmetkerleriniń eńbekaqysy 75 protsentke ósedi.

Bul týraly Mádenıet jáne sport mınıstri Dáýren Abaevtyń mınıstrlikke baǵynysty mekemelerdegi ujymdarmen kezdesýi barysynda belgili boldy. Tıisti jobany QR MSM ázirlep, QR Úkimeti maquldady, dep habarlaıdy QazAqparat mınıstrliktiń baspasóz qyzmetine silteme jasap.

Qazir mádenıet salasynda «ulttyq» statýsyna ıe 5 iri uıym bar: Muhtar Áýezov atyndaǵy Qazaq ulttyq drama teatry, Qurmanǵazy atyndaǵy Qazaq ulttyq halyq aspaptar orkestri, Abaı atyndaǵy Qazaq ulttyq opera jáne balet teatry, Mıhaıl Lermontov atyndaǵy ulttyq orys drama teatry, sondaı-aq Qazaqstan Respýblıkasynyń Ulttyq kitaphanasy. Endi atalǵan uıym qyzmetkerleriniń laýazymdyq eńbekaqysy 1.75 koeffıtsıentimen eseptelip, jalaqy ósetin bolady. Mysaly, 7-10 jyldyq eńbek ótili bar artıster qazir 217 129 teńge alsa, 1 shildeden bastap olardyń eńbekaqysy 379 977 teńgeni quraıdy.

«Ózderińizge belgili, Memleket basshysy mádenıet salasyn damytýǵa, atap aıtqanda onyń qyzmetkerleri úshin qolaıly jaǵdaı jasaýǵa kóp kóńil bóledi. Bul rette mınıstrlik tarapynan aýqymdy jumystar atqarylyp keledi. Eńbekaqyny kóterý – bul mańyzdy baǵyttardyń biri ǵana. Sonymen qatar, biz birqatar mádenıet nysandaryn qaıta jóndeý, materıaldyq-tehnıkalyq bazany jaqsartý jáne qyzmetkerlerdiń biliktiligin arttyrý máselelerin qarastyryp jatyrmyz», – dedi Dáýren Abaev.

Almatyǵa sapary aıasynda mınıstr Natalııa Sats atyndaǵy Memlekettik akademııalyq orys balalar men jasóspirimder teatrynda da boldy, odan bólek sala sarapshylarymen birqatar kezdesý ótkizdi.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT