Jańalyqtar  >
Mádenıet qyzmetkerleriniń shyǵarmashylyq jetistikterin qoldaýǵa baǵyttalǵan syılyq taǵaıyndaldy
2022 jylǵy 13 tamyz 17:19

Mádenıet qyzmetkerleriniń shyǵarmashylyq jetistikterin qoldaýǵa baǵyttalǵan syılyq taǵaıyndaldy

NUR-SULTAN. QazAqparat - Mádenıet jáne sport mınıstri Dáýren Abaev óńirlerdi aralaýdy jalǵastyrýda. Ol Aqtóbe oblysy turǵyndarymen kezdesip, ózekti suraqtarǵa jaýap berdi, dep habarlaıdy QazAqparat.

«Bizdiń búgingi kezdesýimiz «halyq únine qulaq asatyn memleket» qaǵıdatyn iske asyrýdyń mańyzdy dáleli. Biz jaıly jáne ádil memleket qurýǵa baǵyttalǵan ashyq dıalog ornatyp jatyrmyz», – dedi halyqpen kezdesý barysynda mınıstr Dáýren Abaev.

Ol mınıstrlik atqaryp jatqan negizgi jumystarǵa toqtaldy.

«Jańa akademııalyq jyl qarsańynda mádenıet jáne óner salasyndaǵy bolashaq mamandardy daıyndaıtyn oqytýshylarymyzdyń eńbekaqysy birden 75 paıyzǵa kóterildi. Osydan bir aı buryn elimizdegi «Ulttyq» statýsyna ıe mádenıet salasyndaǵy uıym qyzmetkerleriniń de eńbekaqysy 75% paıyzǵa ósken bolatyn. Endigi kezekte arhıv isi uıymdary qyzmetkerleriniń eńbekaqysyn da barynsha kóterýdi josparlap otyrmyz», – dedi Mádenıet jáne sport mınıstri Dáýren Abaev.

Sondaı-aq, memlekettik bilim berý uıymdary muǵalimderiniń balalardy sabaqtan tys sporttyq daıarlyqtan ótkizgeni úshin bazalyq laýazymdyq eńbekaqydan 100% mólsherinde qosymsha aqy tóleý júıesi engizildi. Dene shynyqtyrý jáne sport salasyndaǵy mamandandyrylǵan mektepter men kolledjder qyzmetkerleriniń eńbekaqysy da 25% - ǵa ósti. Mınıstr bul aýqymdy jumys Memleket basshysynyń tapsyrmasymen júzege asyrylyp jatqanyn atap ótti.

Budan ári Dáýren Abaev mádenıet qaıratkerleriniń shyǵarmashylyq jetistikterin qoldaýǵa baǵyttalǵan UMAI syılyǵy týraly habarlady. Ulttyq syılyqtyń jalpy júlde qory 54 mln teńgeni quraıdy. Syılyq: teatr óneri, mýzyka óneri, horeografııa óneri, beıneleý jáne sándik-qoldanbaly óner syndy 4 baǵyt boıynsha beriledi jáne 19 atalymdy qamtıdy. Ár nomınatsııanyń jeńimpazy 2 mln teńge jáne «Úzdik mýzykalyq-dramalyq spektakl» jáne «Úzdik balet spektakli» nomınatsııalarynyń jeńimpazdary 10 mln teńge alady.

Mınıstr jaqyn arada mınıstrlik tarapynan bul týraly tolyq aqparat usynylatynyn atap ótti.

Sonymen qatar, mınıstr bıyl memleket konkýrstan ótken 62 kınojobaǵa qarjylaı qoldaý kórsetetinin aıtty. Osy rette ol Aqtóbe oblysynyń anımatorlaryn anımatsııalyq fılmder men kınokartınalar jasaýǵa belsendi qatysýǵa shaqyrdy.

Dáýren Abaev Aqtóbe oblysyndaǵy týrızm salasynyń áleýeti joǵary ekenine arnaıy toqtaldy. 2021 jyldyń qorytyndysy boıynsha Aqtóbe oblysynyń týrıstik salasyna ınvestıtsııa kólemi shamamen 17 mlrd teńgeni quraǵan. 2022-2025 jyldar aralyǵynda oblysta 221 ınvestıtsııalyq joba iske asyrylatyn bolady. Tartylǵan ınvestıtsııalar kólemi shamamen 3 trln teńgeni quraıdy dep josparlanýda.

«Suraq-jaýap» sessııasy aıasynda mınıstr qala turǵyndarynyń suraqtaryna jaýap berdi. Halyqpen kezdesýden keıin Dáýren Abaev BAQ ókilderine brıfıng ótkizip, azamattardy qabyldady.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT