Lıtvada Muhtar Áýezovtiń 125 jyldyǵy atalyp ótti

2022 jylǵy 30 qarasha, 18:28
Lıtvada Muhtar Áýezovtiń 125 jyldyǵy atalyp ótti

VILЬNıÝS. QazAqparat –A.Mıtskevıch atyndaǵy Vılnıýs oblystyq kitaphanasynda Muhtar Áýezovtiń 125 jyldyǵyna arnalǵan saltanatty kesh jáne lıtva tilinde qaıta basylǵan «Abaı joly» roman-epopeıasynyń prezentatsııasy ótti. QazAqparat bul týraly QR Syrtqy ister mınıstrligine silteme jasap habarlaıdy.

Qazaqstandyq dıplomattar M.Áýezovtiń shyǵarmashylyǵy, aqyn-oıshyl Abaı Qunanbaevtyń ómiri týraly baıandaıtyn álemdik ádebıet jaýharynyń daıyndalý tarıhy týraly aıtyp berdi.

Іs-sharaǵa onlaın rejımde qosylǵan M.Áýezovtiń nemeresi, arabtanýshy Zıfa-Alýa Áýezova lıtvalyqtardyń óskeleń urpaǵy qazaqtyń uly jazýshysynyń murasymen endi ana tilinde tanysa alatynyn, bul múmkindik úshin QR Elshiligi men «Jara» baspasyna alǵysyn bildirdi.

A.Mıtskevıch atyndaǵy Vılnıýs oblystyq kitaphanasynyń dırektory Emılııa Banıonıte «Abaı joly» romanynyń jańa basylymy 2020 jyly el astanasyndaǵy kitaphanada ashylǵan Abaı Qunanbaıuly atyndaǵy oqý zalynyń injý-marjanyna aınalatynyn atap ótti.

Іs-shara aıasynda Abaı óleńderine, onyń ishinde lıtva tiline aýdarylǵan mýzykalyq shyǵarmalar oryndaldy.

Sondaı-aq elshilik dıplomattary qonaqtarǵa bıyl tek Qazaqstanda ǵana emes, búkil álemde mereıtoılary toılanyp jatqan qazaq halqynyń eki kórnekti ókili – Ahmet Baıtursynov pen Roza Baǵlanovanyń ómiri men shyǵarmashylyǵy týraly aıtyp berdi.

Kesh sońynda qonaqtar qazaq ádebıeti, mádenıeti jáne halqymyzdyń tarıhy týraly kóbirek bilýge múmkindik bergeni úshin alǵys bildirdi.

M.Áýezovtiń lıtva tilindegi «Abaı joly» qaıta basylyp shyqqan roman-epopeıasynyń jáne Ánýar Álimjanovtyń «Ustazdyń oralýy» povesiniń tuńǵysh tusaýkeseri 2020 jyldyń 14 jeltoqsanynda pandemııa jaǵdaıynda onlaın rejımde ótti. Jaryq kórgen kitaptar Lıtvanyń barlyq oblystyq jáne basqa da iri kitaphanalaryna syıǵa tartylatyn bolady.


Foto: gov.kz

Uqsas jańalyqtar
Seriktester jańalyqtary

Jańalyqtar