Qyzylordalyq oqýshy erekshe aıaq kıimder tigip, mol tabys tabady
2022 jylǵy 26 maýsym 15:20

Qyzylordalyq oqýshy erekshe aıaq kıimder tigip, mol tabys tabady

QYZYLORDA. QazAqparat - Qyzylordadaǵy №176 orta mekteptiń 9-synyp oqýshysy Ulan Saılaý talaıdy tańǵaldyratyn aıaq kıim tigýmen aınalysady. Ol bul kásibi arqyly mol paıdaǵa kenelip otyr, dep habarlaıdy QazAqparat tilshisi.

Ol atalǵan kásipti eki jyldaı buryn bastaǵan. Dúnıeni dúrbeleńge salǵan karantın ýaqytynda ol mektep oqýshysy bolsa da el arasynda kóp kezdesetin tyń kásipti qolǵa aldy. Alǵashqyda úırenýge ýaqytyn jumsady.

- Bul ónerdi kimnen úırendiń? Otbasyńda tiginshilikke jaqyn adamdar bar ma?

-Anamnyń ıne men jipke jaqyndyǵy bar. Qoly bos sátte quraq kórpeshe tigedi. Tapsyrys qabyldaıdy. Anam meni atalǵan kásipke beıimdeýge kóshti. Keıbir dúnıelerdi ǵalamtor arqyly damyttym.

Sheberlik kýrstardy onlaın oqydym. Instagramdaǵy «Altyn qol» degen paraqsha etnobrendke beıimdeıdi. Onda oqytqan ustazdyń tálimi negizinde óz isime beıimdeldim. Toqymadan ózge de tyń tirshilik kózin tabýǵa talpyndym. Nátıjesinde aıaqkıim tigip shyǵarýdy qolǵa aldym.

- Atalǵan kásipke qandaı tehnologııa paıdalanylady?

- Bul jerde negizinen toqyma bizi men ırandyq jip serigime aınaldy. Aldaǵy ýaqytta jańa tehnologııa arqyly sheberhana ashýdyjosparlap otyrmyn. Alǵashqy ýaqytta bir aıaqkıimge bir kún ketetin. Qazir tájirıbem de artty, kásippen aınalysqanyma bir jyldan asty. Qazir bir saǵat ishinde bir ónimdi shyǵarýǵa bolady. Ol tapsyrysqa baılanysty. Dızaıny men pishini kúrdeli bolsa, 3-4 saǵat ýaqytymdy jumsaımyn.

- Óziń daıyndap shyǵarǵan ónimderdi qansha teńgege satasyń?

- Ádette, qoldan jasylǵan dúnıe qymbat turady. Bizde sondaı oı qalyptasqan. Sol túsinikti buzǵym keldi. Ózim daıyndaǵan aıaq kıimniń shıkizatyna 1700 teńge jumsaımyn. Eńbekti de baǵalaǵan jón shyǵar. Halyqtyń yńǵaıyn da umytpaýymyz tıis. Aıaq kıimderdiń eń qymbaty - 10 myń teńgege baǵalandy. Arzany – 3 myń teńge.

- Qupııa bolmasa aıyna qansha tabys tabasyń?

- Qazir aýqymdy kásip jasap jatqanym joq. Ázirge sheberhanaǵa qol jetpeı tur. Tek tapsyrys boıynsha jumys jasaımyn. Sondyqtan shıkizatty esepke almaǵanda aıyna eń joq degende 70 myń teńge tabys tabamyn.

- Alǵa qoıǵan maqsatyń qandaı?

- Shyndyǵyn aıtqanda, ekiniń biri bul kásipti ıgerip kete almaıdy. Óte qıyn kásip dep sanaımyn. Ázirge tek qoldaǵy múmkindigimdi paıdalanyp otyrmyn. Aldaǵy ýaqytta tıisti oryndarǵa jobamdy usynyp, kásibimdi keńeıtkim keledi.

Eske salsaq, budan buryn Shymkentte Shaolın mektebiniń shákirti turatynyn habarlaǵan edik.


Uqsas jańalyqtar
Seriktester jańalyqtary

Jańalyqtar

Úrdis

MURAǴAT